「梁粉」恒隆地產（101）主席陳啟宗竟然搵埋陳豪預演另類「佔中」？！話說恒隆早前搵著名時裝設計師張路路，為中港兩地前線員工設計制服，今晚六點喺恒隆總部，即中環渣打大廈門口搞花生騷，陳豪係模特兒之一。
搵張路路設計制服
大家都知渣打銀行大廈門口對出行人路嘅空間有幾大㗎啦，恒隆較正寫字樓放工時間搞花生騷，新婚冇耐嘅陳豪又必然吸引大班記者、女粉絲到場，可以預期到時嗰度肯定會聚集一大堆人採訪同圍觀，仲唔係另類佔中嘅預演？
唔講唔知，雖然恒隆喺中港有多個商場收租，但係前線員工從來冇統一制服，一直都係各自為政，從國泰航空（293）過檔嘅董事總經理陳南祿，可能見慣空姐制服整整齊齊，呢幾年巡視恒隆各地商場後，始終覺得唔多順眼，於是搵張路路為旗下保安、前線員工設計多套制服。
抄足國泰提升形象
除咗陳豪，恒隆仲搵來16位專業模特兒，又喺旗下內地商場選出5位「微笑大使」負責表演。講講吓，名師設計制服、微笑大使、花生騷，成件事好有國泰feel，國泰咪一直搵劉培基設計制服，久不久就搞空服員花生騷囉，陳南祿似乎將國泰一套搬咗去恒隆。
李華華
mailto:[email protected]