鄭中基（Ronald）前年成家立室做老竇，多得囡囡好腳頭，佢舊年憑《低俗喜劇》攞咗香港金像獎最佳男配角，鄭中基表明今後會放更多時間喺影壇發展，繼《心想事成》後，今年底佢打算同陳嘉上聯合執導新片《張保仔》，戲中佢會扮海盜，而張保仔一角由古天樂演，女主角係鄭秀文（Sammi），佢哋喺戲中都係海盜。
七千萬成本
劇情講Sammi呢位女海盜因為欣賞張保仔，同佢結婚之後以夫妻檔做海上霸主，專劫商船。其實呢部戲搞咗幾年，起初陳嘉上搵樂視投資，張保仔一角由鄭中基做，但後來樂視嫌製作費太大話唔玩，先至轉由銀河海潤投資，主角都轉埋人，呢間公司係由杜琪峯嘅銀河同內地海潤公司合組而成，部戲成本約七千萬。鄭中基經理人田啟文（田雞） 噚日話：「呢部戲都搞咗幾年，𠵱家劇本仲未寫好，拍攝批文又申請緊，一切搞掂嘅話，希望早過年底前可以開拍，Ronald已經做好晒準備。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！