美斯同尼馬將會喺新球季合作，為巴塞隆拿打進攻，全球粉絲都非常期待，想睇吓呢對黃金拍檔有幾厲害。喺未做隊友之前，佢哋兩個就分別率領一班球星，禮拜二喺秘魯首都利馬打咗場慈善賽，最終美斯朋友隊贏尼馬朋友隊8:5，但兩位「10號仔」同樣入咗兩球兼有兩個助攻，平分秋色。
由阿根廷球星美斯搞嘅慈善系列賽，禮拜二喺秘魯進行第2站賽事。首站喺哥倫比亞舉行，結果美斯朋友隊以9:6擊敗羅賓奴朋友隊。講番禮拜二場波，美斯朋友隊以8:5贏尼馬朋友隊，美斯同尼馬都各有兩入波同兩助攻，就咁睇表現未分高低，但實際係喺新季未定着咩「冧巴」嘅尼馬搶鏡啲，事關剛剛幫巴西贏咗洲際盃嘅佢，有球喺45碼外笠射，賽後仲被選為賽事嘅金球。
美斯拒赴洛城捱轟
之前收咗哥倫比亞藝術家一幅價值5,000萬美金水晶畫嘅美斯，就希望尼馬嚟到巴塞之後可以繼續踢好波：「希望尼馬喺巴塞可以繼續發揮出最高水準，為巴塞作出最大貢獻，就好似佢喺巴西國家隊咁。」至於21歲嘅尼馬亦好識得賣口乖：「美斯肯定係世界第一，我非常榮幸可以同世界上最好嘅球員一齊踢波。我希望可以好快就適應到巴塞嘅生活，呢次轉會係我職業生涯嘅重要一步，但願可以幫巴塞贏到好多冠軍啦！」
美斯雖然同新隊友尼馬踢咗場快樂足球，但之後就因另一場波而搞到好唔快樂。原本，美斯同班球星會喺禮拜三去美國洛杉磯打場慈善賽，點知喺開波前26個小時就取消咗。
主辦單位話係美斯唔願去美國先搞到場波打唔成，事後美斯亦表示對事件感到失望。美國傳媒對美斯嘅決定非常不滿，直指佢欺騙咗美國人，更有報道話佢經已誠信破產，第日唔會再有機會嚟搵美國人嘅錢。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange
《蘋果動新聞》新版App已經推出，居家遊行上街上網都咁方便，快啲更新，全民動起來！
立即下載↓↓
【iPhone版】 http://bit.ly/appledailyiPhoneapp
【Android版】 http://bit.ly/appledailyandroidapp