陳小春和應采兒的小春子本來擇日7月16出世，上天卻為他們帶來驚喜，小春子Jasper提早面世，做了一名回歸B，小春表示老婆大人為兒子擇日改名，希望兒子成為做大事的人，小春日前在旺角接受訪問時說：「日子係我老婆揀，佢話呢個出嚟第日做大事，要好有權力，我就只係期望佢孝孝順順，身體健康就夠！其他乜做大事做大人物，等佢大個先喇！」
倒車撞牆角
陳太除了餵人奶，事無大小都要她全權負責，表情苦中帶甜的小春說：「都係我老婆揀，英文名Jasper，中文又話要搵人算，因為我冇讀過書，我喺佢眼中我係完全冇用，我冇權㗎！差少少佢連個陳字都唔想要，百日宴傾過下，都係佢話事。人奶，我老婆話餵一段時間，長期唔知，佢話事，啲奶喺佢度，唔喺我度，我唔敢建議，我話唔到事。」
雖然聽上去有少少苦澀，陳小春強調他絕不介意，他說：「呢啲主意邊個話事有乜所謂，老婆想點就點，佢都幫我生個仔，咁佢突然話抱個仔走，我都冇辦法。我家庭幾幸福，女人咁鍾意話事，佢話乜咪乜囉！」
夢想做個全職爸爸的小春，之前專程去專業陪月服務中心學習照顧初生嬰兒技巧，第一次學湊B的小春很快上手，他笑說：「係呀！轉行食軟飯，做咗咁多年，硬飯都食過，咪食吓軟飯，睇吓乜味道，喺屋企聽吓輕音樂，同BB仔玩下，幾開心！」
小春除了學湊B，還為了Jasper的成長，決定減產，他說：「男仔喺一至三歲，通常係媽媽照顧，你唔畀佢見，佢會唔記得咗你，爸爸就話出去搵食，多咪食多，少咪食少，唔使一定要好好，𠵱家又唔係等飯開，咪想呢一兩年，可以多時間，可以多交流，唔係以後冇，過咗三歲就乜都冇得玩。」
另外，小春昨日依然在醫院照顧老婆，他出去買外賣時說：「因為BB未可以沖涼，所以未抱到，好想佢快啲沖完，可以聞吓佢啲味。」他又透露Jasper中文名交由外父決定，小春開車載外父買外賣回來時，他將座駕倒後泊位，卻不慎撞到牆角，右後邊車身有輕微損毀，小春下車查看後拍拍心口說：「冇事。」此外有廣告商請他們一家三口拍廣告，但小春不想囝囝曝光而拒絕。
採訪：楊潔雯、魯萍
攝影：葉君海、陳順禎
場地提供：好安心專業陪月服務有限公司
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
《蘋果動新聞》新版App已經推出，居家遊行上街上網都咁方便，快啲更新，全民動起來！
立即下載↓↓
【iPhone版】 http://bit.ly/appledailyiPhoneapp
【Android版】 http://bit.ly/appledailyandroidapp