正所謂「虎父無犬子」，熱火「大帝」勒邦占士咁好波，小占士（Bronny）梗係深得老竇真傳啦；日前大帝帶囝囝去打波，後者打到似模似樣，同老竇一樣咁勁！勒邦占士睇到都老懷安慰，仲話小占士係時候同大人打波㖭呀！
「小大帝」勁入樽
大帝日前帶咗小占士同一班小朋友打波，仲特登拉低個籃框畀班小朋友可以玩得盡情啲。9歲嘅小占士見到個籃框矮咗，即時帶住個波衝埋去飛身雙手入樽！其他細路都比小占士細，又點會攔得住佢？勒邦占士見到都話：「Bronny，咁樣一啲都唔公平喎！」大帝將段片放上instagram，仲加多段自己賽後評論：「小占士應該要同大人打波啦。」言下之意，勒邦占士已經覺得Bronny嘅球技已經比其他小朋友好。希望「小大帝」將來可以子承父業啦！
「大帝」早前因為要專心應付季後賽，所以停晒喺twitter同facebook度嘅留言。不過𠵱家成功衞冕，又再活躍於各大社交網站。佢周二仲post咗張相賀女球迷生日，仲話：「生日快樂呀，阿妹！擺埋你個樣上面書，唔好意思！畀心機打波呀！」