港姐前冠軍向海嵐（Anne）離開娛樂圈，北上幫「上海姑爺」羅康瑞嘅瑞房（272）打工，差唔多有四年幾，舊年辭職走去創業搞婚禮統籌。雖然佢唔再係瑞房員工，但一樣好撐舊公司，噚日仲以瑞安薈（瑞房嘅業主會）名譽顧問身份，幫瑞房在港推銷樓盤。
曾介紹蔡少芬幫襯
Anne雖然離開咗銀幕有一段時間，但面對記者依然冇怯場，仲有辦有眼咁介紹加入瑞安薈做會員到底有幾咁好。佢認為，自己喺娛樂圈嘅經驗絕對幫到佢喺瑞安薈嘅工作，至少用佢嘅知名度去搵嘉賓出席講座同聚會，都容易好多。
瑞房將會在港推售位於上海、重慶、大連、佛山嘅四個樓盤，合共104個單位，賣晒估計可以套現5億元人民幣。Anne話，之前都有介紹過蔡少芬等娛樂圈朋友幫襯瑞房買樓。唔知今次佢又會唔會搵齊成班港姐朋友去展銷會睇樓同幫襯呢？