近期《華爾街日報》出咗一篇專題報道，提到人行6月19日內部會議紀錄，話6月份前10日有1萬億人民幣新增貸款，中央形容呢種規模係前所未有，當中約70%係短期票據，其中大部份唔會出現喺銀行資產負債表，以便繞過監管部門信貸限制。
上期講到，內銀錢荒可能有更驚人嘅內情，上述報道似乎加強晉佳諗法。喺6月尾半年結之前，放貸咁猖狂，其實內銀高層應該好清楚會觸動阿爺神經，但仍然有人願意付出被阿爺重罰嘅代價鋌而走險，實在不尋常。掉番轉頭諗，如果6月初新增貸款冇瘋狂增加，係咪會出現更多違約事件，會唔會仲大鑊呢？
幾經辛苦終於捱過6月，踏入7月又係新一季開始，銀行總算有新嘅貸款額度，起碼內銀呢幾日都可以有足夠新增貸款，債仔以至銀行周轉唔成問題，可以唞唞氣，至於大戶逼住喺中港股市提款救命嘅誘因，暫時大減，所以港股上周連彈幾日。不過，內銀錢荒其實冇明顯進展，可能7月初都要撲水救命，到時內銀嘅新增貸款再爆升，然後市場再陷驚恐心態，相信呢日遲早出現。
趁反彈出貨逃生
上一輪水緊觸發班資回朝，令股市急跌，7月初資金緊縮嘅情況停一停，股市上月尾開始反彈。如果市場再度觸發下一輪班資回朝，要錢唔要貨嘅範圍只會更闊更廣，股市跌勢肯定比6月更急，趁大家開始相信錢荒已過，𠵱家逃生窗已開，就係時候部署出貨，甚至清貨，等情況真正改善先入市。
之前提到，恒指補番6月20日個下跌裂口，同埋去到保歷加通道中軸（目前延伸至21043），就係第一個反彈目標，呢個位基本上噚日已經達成，意味博反彈最juicy嗰part已經完咗，即使之後個市仍有機會反覆chok上去，但絕對變成高風險投機項目，贏就好難贏大鑊，輸就可能大大鑊，勝算咁低，晉佳建議大家𠵱家先行撤退，除非揸住破頂股，就等佢回先至食糊。
晉佳
本欄逢周三、五刊出