三江化工（2198）大股東管建忠近排密密增持，股價亦成功止跌回升，翻查往績，大股東出手往往係大升浪嘅開始，現價跟進依然博得過。
對上一次管建忠連環大手增持，要數到舊年9月，當時股價仍處於兩蚊邊水平，以平均價計，由9月中2.128元，買到11月底嘅2.72元，其間累積升幅接近三成，已經十分勁抽，但好戲卻在後頭，因為升勢一路延續，至今年5月高見4.56元始見頂，累積升幅超過一倍，就算等佢完成整個增持行動先出手，都有超過六成賬面利潤。
管建忠上月下旬再度出手，以平均價3.548至3.814元掃入三江化工，6月25日大跌市更一口氣掃入265萬股，持股量由47.96%增至48.2%。睇番基本因素，三江化工主要產銷環氧乙烷、表面活性劑及加工服務，為家居清潔劑、化妝品等主要成份，用途廣泛；現價市盈率6.6倍，息率4.7厘，以其盈利每年保持雙位數增長來說，估值絕對吸引，跟主席一轉順風車，贏面甚大。
唐牛