年輕股民對於恒指公司每隔兩秒報價一次，可能覺得係天經地義，或者仲會嫌慢，未必知道44年前，恒指每日只能喺收市後報價一次。1986年之前，恒指都仲係由人手計算，𠵱家聽落有啲匪夷所思！
手抄收市價夠經典
恒指公司董事兼總經理關永盛喺內部刊物話當年，原來以前要計恒指一啲都唔易，1986年前，股市交易未電子化，交易所嘅價表寫喺黑板上，公司要每日派同事去交易所手抄收市價，拎返公司用計數機計好再發放。
1969年開始時每日報價一次，1972年每日兩次，1976年三次。直到1986年，為準備推恒指期貨，恒指系統轉為電腦化，先做到一分鐘一次，1999年因應盈富基金（2800）推出再加快至每15秒，今年4月變為每兩秒報價。
至於點解由恒指公司做指數，因為夠獨立喎。