電盈（008）主席李澤楷舊年底以過百億元買起ING嘅港、澳、泰業務後，一直冇乜聲氣，保險公司新任CEO黃大偉噚日終於向港澳員工發出通告，宣佈公司中、英文名分別改為富衛及FWD。
揼本推廣新品牌
據介紹，FWD解作Forward，代表公司不斷推動業務向前邁進嘅決心，富衛就意味「保衛財富」。聽聞，除咗香港同澳門，泰國公司一樣叫做FWD，大偉同員工講，未來要大力推廣公司新品牌。
小小超較早前接受《彭博商周》中文版訪問時都有提到呢瓣保險業務，原來公司喺泰國已經有差唔多9,000個保險經紀，亦喺印尼同菲律賓攞咗牌照。睇嚟小小超真係有心再次大搞保險業，唔知佢會唔會又搵城中邊位鑽石王老五賣廣告呢？