股壇長毛David Webb，上星期睇完財經事務及庫務局局陳家強喺一個訪問中，係咁讚政府推出辣招（買家印花稅與雙重印花稅）有效之後，好鬼火滾，忍唔住撰文呼籲大家寫電郵去立法會，要求議員反對通過兩條相關嘅修訂條例草案。
Webb引述陳家強話，過去數月樓市成交下跌，政府已經達到出招目標。Webb質疑，陳家強所講嘅目標係乜？唔通係凍結樓市？令地產代理失業？趕走有意搬來港居住嘅外國人？明寸政府落錯藥。
對於政府推出呢幾招遏抑樓市，Webb一直有意見，今次係再踩一腳，並呼籲大家有所行動，寫電郵去立法會嘅法案委員會，希望兩條修訂條例草案過唔到。香港係一個自由經濟社會，就連中原創辦人施永青都走出來，率領一班代理去立法會請願，呢啲辣招係咪太辣，政府真係要諗諗。