港股上半年埋單倒跌8%，表現虎頭蛇尾。展望下半年，美國收水肯定係股市嘅主旋律，至於幾時炒上幾時炒落，就視乎大戶嘅意向。逢低吸納美國復蘇概念股如偉易達（303）、創科（669）、彩星玩具（869）及敏華（1999），年底料有大斬獲，科網股如金山軟件（3888）及網龍（777）亦可看高一線。
內地6月製造業PMI回落至50.1，但A股上周五不跌反升，證明早排大跌已反映相關因素，有利港股反彈。股仔寰宇國際（1046）上周五創出近兩年收市新高，可短炒一轉。集團近排動作多多，繼出售大嶼山物業後，大股東林小明抵押所持50.2%股權以換取貸款，押股理應係壞消息，為何股價可節節上升？憧憬賣殼是也。寰宇市值僅2.1億元，連殼價都未到，加上早年已傳出林小明想賣盤，現時捲土重來絕非無可能。寰宇上周五成功破旗，絕對有力再上，用殼價3億元作目標，股價可見0.175元，潛在升幅41%。
唐牛