謝霆鋒創立嘅製作公司PO朝霆，8年喪賺6億元，早兩日更被邀出席論壇講營商秘訣，商業成就已被肯定。
藝人夠知名度，搞生意勝算點計都高啲。尤其做時裝，只要響朵，粉絲們都會乖乖進貢，「台灣天團」五月天主音阿信就係其中一個成功例子。
阿信07年同老友創辦時裝品牌STAYREAL，目前中港台日共有16間門市，當中兩間仲搞埋café shop。上年營業額超過3億台幣，折合約7,770萬港元，按年增加約50%。雖然規模唔算大，但以擁有超過2,600間門市嘅佐丹奴（709）為例，一年銷售額56.7億元，粗略計每間舖平均貢獻214萬元。STAYREAL平均每舖年銷售487萬元，多佐丹奴超過一倍，當然，成功唔單止靠粉絲撐，品牌擅長玩唔同卡通crossover，吸引其他客源。
雖然藝人借人氣創業容易事半功倍，但娛樂圈變化大，冇人寫包單可以紅一世，為保險計，品牌終有日要脫離藝人嘅光環，先可以長做長有。
Fifi
本欄逢周二、四刊出