【銅鑼灣霎東街→時代廣場】唔少名人、藝人二代經常喪玩喪蒲，好似王敏德同名模馬詩慧個女王曼喜，早排就被發現攬仔煲煙，搞到馬詩慧唔多高興。不過，星二代當中亦有好多又乖又生性，好似余安安同前夫李萬祺生嘅大女李文琪（Marcia）就係最佳例子。現年25歲嘅文琪讀書叻，舊年成為註冊律師，佢唔止俾人見過搭小巴出入好慳家，而且好多時都係孖住媽咪行街食飯，相當孝順，唔似得其他星二代咁成日劈酒媾仔。
有講有笑感情好
前日下晝4點幾，文琪又同媽咪余安安出動，佢哋坐女友人部七人車去咗銅鑼灣霎東街，文琪先陪媽咪去補鞋店補鞋，而女友人就將部車泊喺時代廣場。生得標緻可人嘅文琪着住背心仔同短褲，打扮好陽光好有活力，至於53歲嘅余安安亦着住背心趁短裙仔，打扮唔比大女輸蝕，驟眼望過去，兩人齊齊晒吓腿，好似兩姊妹咁。
余安安同囡囡放低對鞋喺鞋舖之後，行咗去附近一間coffee shop等女性朋友，之後三個人飲嘢吹水，傾得相當開心。大概45分鐘之後，三個人有講有笑離開，跟住齊齊行去時代廣場嘅停車場攞車走人。
採訪、攝影：羅德光、吳耀輝
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！