上星期五應錢志健兄（現已榮列佔中死士之一）的邀請到蘭桂坊出席「佔中」座談，其實都係去到方知，與會大都是財經人士、金融才俊，原來兩位發起學者，戴教授和陳教授亦隨後趕到，我能叨陪末席，幸甚。而現場傳媒記者之多，和出席人數亦不相伯仲，連兩份黨報都派員採訪，可見「佔中」的招搖。
如此陣仗，我自當瑟縮一角，皆因赴約前以為係齋吹淨飲，又點諗到身處蘭桂坊都竟然滴酒未沾，真係失禮，仲因為一棚記者，更要低調而行，不過每有提問總算有問必答，點都唔似偽首咁，三番加四次仍是「不作置評」的迴避。
少不了的問題是：「為甚麼要佔中？」如果有些事情或方法，真的是行之有效，能達到預期的目標，起碼進步可見，根本犯不着要改轅易轍、自找麻煩搵嚟搞。可惜若只因循採取同一手段或方法，卻默默期望不一樣的成果出現，這種策略思維，姑且可名為「等運到」，不過港人等了16年，除了接踵而至的厄運，未知等到啲乜嘢？
自身權利怎能遭剝削
回歸至今，經濟利益，越見傾斜輸送；財富分配，惟有不公不均；政府工作，亦只逆民壞事；言論自由，屢被扼殺消聲；中港交往，日增矛盾衝突；執政班子，更加窩囊缺德；建制勢力，獨長囂張跋扈。
咁嘅情況都仲要等？即係有男人同妳講足16年，話佢一同個老婆離婚就會即刻娶妳，今日都仲係咁叫妳畀多啲時間佢，然後急不及待就上下其手，仲一路伸條脷過嚟，一路話：「我真係好愛妳㗎 」。就算當妳那年真係「無知少女」，今日好歹也是久經人事的中女，咁都任人蒙蔽，一就係妳有病，仲係好嚴重嗰隻；一就係妳要靠個男人包養，無力更生。敢問這位「香港」小姐，到底是哪種情況？不然的話，怎由得自身權利和尊嚴被剝削、被褫奪咁耐，都仲話要悉隨尊便、望天打卦？
所以對我而言，「佔中」如何醞釀熟成，以至面世宴客，我倒不甚在意，反正亦沒多大興致去跟進箇中流程和部署，這些還是交托發起單位從詳計議，是晚得以表達己見，已願足矣。只要「佔中」沒有偏離爭取2017普選行政長官的單一訴求，且讓中央堅定落實「港（前面係唔使加埋啲乜嘢「愛國愛」嘅先決條件）人治港」的嚴肅承諾，我亦謹此聲明，往後只待大會吹雞，我必義無反顧，隨傳隨到。佔領又好、擁抱又好、癱瘓又好，就算情陷都好，總之就係以「公民抗命」的形式，進駐這「中心的中心」，擺明車馬向政府作最後通牒，民眾可以說「不」。
「佔中」未必無罪，惟知「佔中」其中有理。
盧先亞