上個禮拜，又再係孫柏文撈財經演員生涯嘅另一低潮。
先有舊年叫大家一注獨贏，今年又重申叫買嘅珠江鋼管（1938）喺上周初發盈警。呢個禮拜，我將會由四方八面打聽關於珠江鋼管嘅最新資料，到下個禮拜將會作出最新決定。
對白銀信心有動搖
上周係低潮嘅第二原因，就係作為抵抗紙幣狂魔嘅白銀戰隊隊長嘅我，睇住白銀創六年新低。
06年我第一次叫一注獨贏買白銀嗰日，每盎斯10美元，我亦提供每盎斯120美元嘅目標價。之後喺08年初見21美元，不過到08年10月，雷曼爆煲後，佢跌到落八個幾。喺嗰刻，我完全未驚過，對白銀喺2016年之前見120美元完全有信心。不過去到上個禮拜，我同一個做政務官嘅白銀戰隊成員傾開，我第一次開始對自己個分析有懷疑。
我同佢講，話06年嗰個劇本，就係美樓市為首嘅全球信貸泡沫爆破，之後出現二戰後最嚴重嘅金融危機，跟住各央行為求減輕負債負擔，會瘋狂印鈔，最後就係好似毒癮咁，越印就越要印。就係喺咁嘅情況下，一隻冇得印嘅白銀，就會乘呢個紙鈔海嘯浪上120美元。
點知，去到呢刻，劇本冇錯過。唯一錯，就係唔通央行印鈔係可以停？可以忍受毒癮嘅withdrawal？
最後，第三個令我覺得陷入職業低潮嘅就係上個禮拜五，利世民喺佢《利字當頭》一欄度，話我：「可能受珠江鋼管災難影響，講到大陸錢荒的時候，這個向來說一不二的老友，竟然雙邊下注，講了救與不救的可能性。阿彌陀佛，交學費換來的領悟，終於發酵出結果。」我可以睇落微觀錯（珠管）、宏觀錯（白銀），不過做牆頭草叫兩手準備？never！因我寧錯！都莫冇view！我只不過真係喺嗰刻，睇唔透呀！
孫柏文
獨立股評人
http://facebook.com/shuen
本欄逢周二、四刊出