上半年股市走勢真係一地眼鏡碎，恒指埋單跌近一成，主因日本量寬，促使資金由中港股市湧向日股，加上美國穩步復蘇，令儲局放膽收水。中共新班子上場，為前朝執手尾，要調整增長結構，谷信貸搞基建的時代不再，中資股首當其衝，咁嘅形勢，下半年點搞？
炒股票是鬥少犯錯的遊戲，用10萬蚊炒5轉，頭4次各贏20%，回報可翻一番，但如最後一轉輸40%，回報就會縮水至24%，可謂一鋪致命，能夠避免中伏，揀中股份的機會自然提高。下半年首要避開資源及內需股，基建及水泥股亦可免則免。
上半年一枝獨秀的科網股，下半年仍是焦點，金山軟件（3888）及網龍（777）屬逢低吸納之選。此外，可留意三大炒作概念：一、美國復蘇股，包括敏華（1999）、創科（669）及彩星玩具（869）；二、內房股，個人特別睇好綠城（3900）、融創（1918）及合展（754）；三、航運股，波羅的海指數確認見底，航運股陸續加運費，太平洋航運（2343）及中海集運（2866）股價睇高一線。
內房殼股未炒完，深圳科技（106）及西王糖業（2088）屬較落後之選，當中深科形成大旗形，可待突破1蚊追入，短炒上望1.30元。
魏力
http://www.facebook.com/2012jason
本欄逢周一、二、四、五刊出