香港人7.1上街遊行，喺地球另一邊嘅英格蘭，7.1係唔少新領隊嘅上班日。新一季英超至少有1/4球隊換咗新領隊，包括新紅魔話事人莫耶斯同重臨車路士嘅摩連奴在內，5位新帥都喺7月1日正式返工。
除咗莫耶斯同摩連奴之外，曼城嘅比歷連尼、愛華頓嘅馬天尼斯同埋史篤城嘅曉士都係喺7.1履行佢哋同新東家嘅合約。正式接替費格遜出任曼聯領隊嘅莫耶斯，喺周一當地時間8點準時現身卡寧頓訓練場，揸車嚟到嗰陣已經有唔少記者喺度等緊佢。莫耶斯亦帶埋之前喺愛華頓嘅舊部屬過檔紅魔，包括副手史堤夫朗特、門將教練基斯活士同埋一隊教練林斯頓；莫帥話同呢幾位戰友共事多年，有信心會喺曼聯一齊取得成功咁話喎。
莫帥開工大把嘢煩
喺莫耶斯架車裏面，我求大俠見到有個藍色透明公文袋，裏面唔知係咪有啲乜嘢秘密招數，幫佢可以順順利利駕馭到一班紅魔球星；不過既然已經由藍轉紅，莫耶斯其實應該都將佢啲用具轉埋紅色吖嘛。曼聯好快就會展開亞洲行，而13號喺曼谷對當地明星隊，就會係莫耶斯第一場領軍比賽，但之前莫帥仲有唔少工夫要做。
第一單就梗係先要搞掂朗尼去向嘅問題，相信莫帥𠵱家正式坐正之後，會喺一兩日內同朗尼坐低傾一傾，係留係賣都要有個決定。之後就要着手加強班底；自從球季完咗，有關曼聯新收購傳聞有唔少，但大手交易就仲未見到。有傳巴塞小將堤亞高艾簡達拿會係紅魔加強中場嘅頭號目標，亦有傳莫帥喺曼聯嘅第一筆收購係阿根廷守將加雷。
比帥着老西曼市「濕平」
至於曼城新帥比歷連尼，喺周日已經現身曼市，周圍行吓兼「濕平」，仲揀咗套型仔西裝。曼城前鋒泰維斯已經離隊，迪斯高亦盛傳會跟住走人，「工程師」上任後要即刻為曼城物色番個射手，據講佢睇中咗剛啱助巴西贏洲際國家盃冠軍嘅老將費特。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange