變身芬佬嘅財經專欄作家曹仁超（曹sir）大病初癒今復工。曹sir今年5月初做定期檢查時，意外發現患上胃癌，隨即動手術切除半個胃，雖然醫生建議佢休息三個月，但曹sir實在難忍一鋪投資癮，休息一個多月，今日第三季開波即復工，重投魚缸懷抱。
三星期瘦廿磅 氣弱游絲
華華噚日打電話問候曹sir，傾咗幾分鐘，發現佢氣弱游絲，唔似以往咁聲如洪鐘，對答亦相當簡潔，一句起兩句止，同以前口若懸河大相逕庭。原來佢瘦咗廿磅，休息一個月，仍然感到好疲倦。
佢話，家陣冇咗半邊胃，胃口好差，搞到精神狀態未係好好。豁達嘅曹sir卻不忘搞笑話：「三個星期瘦咗廿磅呀，哈哈哈，不過割都割咗十磅啦。」過咗呢關，佢最大嘅感受就係「健康最重要」。
其實上月初曹sir已經喺報章上，好樂觀咁話自己做咗最成功嘅「止蝕」，仲呼籲大家無論投資還是健康，都要有理智決定。
雖然醫生同曹sir交帶落，如果想要完全康復，就要休息三個月先得，不過曹sir就唔多聽話，急不及待要復工。
佢話「始終唞咗成個月，諗住聽日（今日）開始，都係時候返工嘞，其實之前都係半返工狀態㗎啦，唔會太辛苦嘅。」
近年曹sir同朋友合作搞基金變身芬佬，用自己牌頭做生意，點會唔着緊呢？記得唔好咁操勞喇。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange