新任英倫銀行行長卡尼（Mark Carney）噚日履新，呢位加拿大人係英倫銀行成立319年來，首位外國人行長，英國同加拿大部份傳媒紛紛以「Rock Star」形容佢，BBC直情話佢似影星佐治古尼，鍾意到佢不得了。
48歲年輕有為
卡尼似唔似佐治古尼真係見仁見智，佐治古尼嘅粉絲未必認同，但喺金融圈，48歲嘅卡尼的確算係叫人飲得杯落。至少講番近啲，本港財金官員當中，都冇乜邊位可以俾人話似邊位影星。
卡尼喺高盛工作13年，住過紐約，返加拿大後喺財政部工作，之後成為加拿大央行行長。佢同英國嘅關係好密切，曾於牛津大學讀書，太太係英國人，四位千金擁有英國同加拿大雙重國籍。