早前左丁山講過香港總商會、中華廠商會、工業總會等主要商會有意聯合行動，反對泛工黨主張嘅最高工時、標準工時（以下簡稱工時）立法，想唔到啲大型有牙力商會未有真正行動之前，五十四個商會已經組織咗一個「香港各界商會聯席會議」，成立宗旨在反對工時立法，批評「政客騎劫民粹，圖將企業公營化」，一開波已向泛工黨議員挑戰，火藥味十足，兼且推算出有工時立法之後，一個飯盒會漲價到80元，幾嚇人。
其中一位商會代表、聯席會議成員C博士以前與左丁山見過幾次面，叫做大家識得，呢日在中環見到佢，佢成個戰鬥格咁款，似乎比林鄭月娥更加打得。問C博士：「商界素來縮頭縮頸，面對爭議性議題通常唔敢講得好大聲，逢係出席城市論壇、電台節目、電視對談，都係你推我讓嘅，俾工聯會、工黨、民建聯搶晒風頭，兼且輸晒輿論嘅，呢次點解咁好火？」
C博士話：「我地54個商會以中小企為主，總商會等多數代表大企業，易俾政府河蟹，但最低工資立法後，我地中小企受影響最大，而總商會啲大企業就唔多覺，故此我地認為必須為自己利益着想，自己去爭取，唔靠得大商會咁多。最低工資一役，我地中晒計啦，講好兩年檢討一次，依家一年就話加薪，兼且最初大家冇講飯鐘錢，實施後就夾硬嚟，駡我地係無良僱主，真係諗起都條氣唔順。講到工時立法，張建宗又試叫我地唔掂傾到掂，經最低工資一役，呢次信張建宗都儍啦，一於冇得傾，我地立場清晰到極，堅決反對為工時立法，在勞資顧問委員會無妥協餘地！」
真係好硬噃，但人地陳婉嫻、李卓人牙尖嘴利，聯席會員有冇人膽敢上陣應戰呀？C博士哈哈大笑：「我地以前唔駁嘴，唔好以為我地係啞嘅。呢次我地有幾位委員願意隨時上陣呀，邊個電台電視台城市論壇搵到，一於奉陪到底，怕乜陳婉嫻、李卓人！」好堅定噃，C博士話如果輸埋工時呢場硬仗，下一步工會就要全民退休保障，呢個終極目標，害死香港工商界，將香港變成歐豬國，好唔掂。唔，兩陣對壘，陳婉嫻在佢嘅專欄話明「勞工權益，寸步不讓」，工時立法大戰一觸即發，梁振英政府最好使出拖字訣，拖到2017做埋呢一屆先啦！