北愛爾蘭高爾夫球手麥艾萊，同埋丹麥網球手禾絲妮雅琪呢對體壇金童玉女，喺佢哋由2011年夏天拍拖開始，已經唔被外界睇好；據麥艾來身邊朋友透露，24歲嘅麥艾萊嫌22歲嘅禾琪太黐身兼黑腳，決定斬纜咁話。
拍拖後越打越沉
仲記得2011年夏天，當麥艾萊同禾琪啱啱一齊嗰時，佢哋兩個都係事業高峯，男嘅奪得美國高球公開賽冇耐，完全係up-and-coming高球手，前途無可限量。至於禾琪，當時更加係網壇1姐。兩人之後的確愛得癡纏，不時喺對方嘅社交網站留骨痺message，又毫不避嫌咁捧對方場，就算係一方開緊記者會，另一方都會失驚無神踩場，兼且喺公開場合親熱，大晒恩愛。不過就因為咁高調，而且兩個都咁後生，所以外界都唔多睇好，更加有人覺得佢哋嘅行徑令人反感。
真係唔知邊個剋邊個，佢哋拍拖之後，兩人喺運動場上嘅成績就江河日下，麥艾萊之後一直冇贏過大賽，連可以躋身爭標之列嘅機會都唔多；而喺上周六嘅濕星賽事愛爾蘭公開賽，麥艾萊更加次圈出局，真係冇面目見江東父老。至於禾琪亦唔好得去邊，拍拖後不時爆冷喺賽事早段出局，世界排名亦跌至第9，而正打緊嘅溫網，禾琪亦已經喺次圈止步。
嫌禾琪太黐身
可能眼見自己同禾琪由金童玉女變成苦命鴛鴦兼笑柄，加上又嫌禾琪太黐身，據英國《太陽報》報道，麥艾萊決定唔再同禾琪一齊。雖然兩人嘅經理人都否認分手傳聞，但麥艾萊身邊一位唔肯透露姓名嘅朋友就話：「麥艾萊家陣正想辦法甩身，睇嚟佢同禾琪都差唔多玩完。」