十年，十個7.1，曾經上街或者今日首次上街嘅你，衣櫃裏點可能冇一件上街Tee，即使真係冇或者想買件新嘅，只要你去現場走一轉，實行由銅鑼灣買到中環，保證可以執到一件心水戰衣。除咗一如以往嘅白色同黑色Tee任揀，今年有年輕人設計兼人手印製嘅白色「熊抱背心」，警告警察大叔咪以執勤為名，博懵非禮抽水揩油，絕對係社運女嘅首選。
【民間人權陣線】孤星淚Tee
售賣街站：銅鑼灣黃金廣場 售價：60元
民陣件Tee 60蚊有交易。今年設計咗三款Tee，最hit莫過於呢件以《孤星淚》名曲《Do You hear the people sing?》。民陣今年仲有為十年7.1，推售一套十款嘅襟章，每個均印有當年嘅遊行主題，只需30蚊。
【左翼21】階級Tee
售賣街站：燈籠街 售價：88元
左翼21呢件「Class War」階級戰爭Tee真係最型格嘅選擇。左翼21黃永志話，呢件衫係話畀社會聽，不能再忽視打工仔女嘅聲音，勞動有價。黑白兩色，任君選擇。
【公民黨】紅帽Tee
售賣街站：希慎廣場對出 售價：88元
為抗無能狼英管治，公民黨今年整咗一件小紅帽Tee，Tee上嘅小紅帽公仔擺出交叉手勢，表明「對狼說不」。呢件Tee仲有兒童裝尺碼，等家長同小朋友可以親子裝示人。
【製作人】熊抱背心
售賣街站：灣仔軒尼詩小學對出 售價：100元
設計同製作人Gardenia噚日喺fb專頁Bear with HK公開佢呢件人手印製嘅白色背心，前面印住「嗱嗱嗱」，後面印住「你唔好熊抱我」，警告班差人唔好再熊抱佢哋。
【職工盟】碼頭Tee
售賣街站：天樂里 售價：98元
今年嘅碼頭工潮波瀾壯闊，相信遊行人士不乏工人。如果想繼續撐工運，市民不妨到職工盟嘅街站買番件。今日若然太曬或突然落雨，職工盟仲有印有「撐」嘅黑傘賣。
【佔領中環】佔中書
售賣街站：灣仔地鐵站A4
今年佔領中環將會設街站，雖然呢件佔中Tee未有得賣，但係就有佔中發起人戴耀廷《佔領中環》嘅書賣，捐款200蚊就可以有一本。市民仲可以同戴耀廷、陳健民、朱耀明影相。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange
【7.1上街】毋懼打壓 打機消氣
近年警方經常粗暴對待示威者，輕則熊抱兼抬人，重則出動胡椒噴霧「喪噴」示威者。但港人追求民主無畏無懼，點會輕易屈服？即玩《七一的進擊》和《Don't BIG Me》兩個小遊戲，大家一齊消消氣。
網頁遊戲：七一的進擊： http://bit.ly/71defend
手機遊戲：Don't BIG Me： http://bit.ly/Dontbigme