溫網進入第二周，但對很多球迷來說，今年溫網可能喺Day3已經完咗：睇住拿度Day2首圈出局，驚魂未定下，Day3連溫網之王費達拿都輸埋！連同舒拉寶娃、禾絲妮雅琪、伊娃洛域全數出局，仲有艾莎倫嘉、泰桑高等受傷退賽，這個Day3震撼程度就像睇住成個主場館陸沉一樣！
最無聊是擊敗拿度的達西斯報稱賽後開始肩背痛，第二圈退出；以進取打法踢走費達拿的史達賀夫斯基，亦在緊接的第3圈出局，實令人啼笑皆非。搞到上周末睇波都提唔起興趣。
場地整傷球手
雖然大部份出局球手都拒絕以受傷或場地問題作藉口，但如此嚴重的爆冷和傷退潮，很難不聯想背後有原因。傷癒的拿度本年從未參加草地賽，首圈明顯未適應在草地上跑動，出局有迹可尋；但舒娃在賽事中三次滑倒、艾莎倫嘉更因此拗柴傷出；看來無論主辦單位怎否認，場地應該都有問題。有指今年春天英國特別寒冷多雨，影響草地含水量。另外草地賽季短暫，溫網與泥地賽法網只隔2周，亦令球手難以適應。2015年兩項大滿貫賽事將相隔3周，希望到時有所改善。
拿度及費達拿提早出局，男單焦點落在「1哥」迪祖高域與梅禮之爭。ATP官網的近52周草地賽表現排名，有趣的是排第2的費達拿輸咗、第4及第6的伊士拿與泰桑高傷出、第5的盧迪克已退休，前8球手中竟有一半已不在溫網賽場。而主場出擊的梅禮排第1，迪祖則只排第8，會否預視着甚麼？
方柏翹
now足球評述員