吐出「敲佢個老虎頭」，令76歲的盧少蘭成為小市民單挑權貴的經典人物。十年過去，公屋租金官司敗訴、入稟挑戰領匯上市功敗垂成，但每年7.1她仍堅持上街爭取全民退休保障，「我咁嘅年紀，好多戰友都走咗去做地下黨（過世），我都冇得幾多年行，幾大就幾大，燒賣就燒賣，唔行點得？」
「有力氣點都行一段」
「03年沙士，我梗係記得，你唔好蝦我係阿婆冇記性，十年前嗰個董建華話老有所養吖嘛，養到𠵱家到嗰個梁振英，養咗去邊？靠仔女靠唔住，靠政府，政府唔做嘢，唔出嚟行點得？以前啲人鬧我阻領匯上市，阻人發達，𠵱家咪應驗咗路遙知馬力，日久見人心呢句說話囉，你見到啲婆仔老到死仲要做清潔，匿入廁所食飯，你話幾咁陰功？」
上周四下午，她就與大班公公婆婆開會，商討7.1遊行大計，「嗰日主力派傳單，有力氣就點都要行一段，做得幾多得幾多」。當年與她「拍住上」的老戰友，不少撒手人寰。「賽雲都走咗去做地下黨啦……」03年7月11日，第一場公屋租金官司勝訴，家住葵涌邨的何賽雲，是60萬公屋家庭的測試案例，也是盧少蘭的好姊妹。「我哋有啲入咗老人院，有啲好似賽雲咁加入地下黨，我份人聲大大，先至擺耐少少。我話你知，我哋唔知乜嘢叫灰心，班高官高高在上，唔明白民間疾苦，叫嗰個梁振英嚟，睇吓我敢唔敢鬧佢？」