庸官誑言，惡過沙士。曾諷刺李家之城隻手遮天的羅國輝神父，形容今年的社會環境較03年沙士爆發更差，語言偽術令民怨四起，紅色地產商雷厲入侵，今年將會參與7.1遊行，如有需要，不排除參與明年的佔中行動，「希望明年唔使行啦，不過如果佢開大炮打，我梗係行啦，坦克車嚟我都行，但如果佢搞掂咗（普選），我行嚟做乜鬼啫。」
庸官惡言如病毒
「一定要去遊行，咁多年囉，香港邊度有好過？全體巿民心中有數啦，烏煙瘴氣，𠵱家係咪人民當家作主吖？冇教育家、冇政治家，得政棍同教育棍……睇吓賣地情況點？邊啲人買咗呢，唔係嗰啲商家，就係呢啲商家，嚟嚟去去都係紅色商家，同其他商家有乜嘢分別？……唔好講咁多啦，要做喇。」
羅國輝認為，香港現時的情況較10年前更壞，執政者口出惡言，猶如病毒傳播，感嘆港人可憐，「嗰時好似有幾多希望，𠵱家唔係出面嘅沙士吖嘛，𠵱家係嗰啲好勁嘅沙士吖嘛，會飛沫傳染，啲病人喺度講嘢，講完使人有病」。
他批評現時的政府沒全盤治港計劃，沒有人民監察，並非為人民服務的政府，「回歸咁大日子，大家都要慶祝吓，咪出嚟遊行囉，怕唔怕辛苦？𠵱家唔辛苦咩？最緊要係唔好變成每年一個儀式，變成永遠冇出路，行來行去嘅死胡同」。