吳雨霏（Kary）同余文樂嘅一年情正式玩完！前日仲死撐冇分手嘅Kary，終於知道箍煲冇望徹底死心，噚日發信畀傳媒公告分手消息：「這一年來是緣份令我們從朋友變成情侶，亦因彼此了解而和平分手。現在我和阿樂仍然是好朋友關係。」
Kary話同樂仔依然好關心對方，佢哋都有共識一齊面對，希望大家畀空間佢哋。之前有傳兩人因性格不合成日嗌交，加上樂仔嫌Kary太黐身，決定做番朋友，但Kary唔死心希望箍煲，所以前日都唔認分手，弊在樂仔堅拒復合。
為舊愛平反
樂仔雖然飛甩Kary，但仍幫佢平反負面報道，佢噚日透過經理人公司回應：「我哋雖然分開咗，但仍然係好朋友，非常關心同支持對方，我想同大家講，之前有關一切傷害佢嘅報道並唔真實，我哋會好好珍惜呢段友誼！」另外，樂仔好友周柏豪噚日喺灣仔為新戲《販賣．愛》拜神時話：「噚日（即前日）同樂仔練波，見佢同平時差唔多，但我冇問佢。」有指Kary太黐身導致分手，柏豪避答：「佢係好人，做朋友一流。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange