【本報訊】有人說，家駒離開後，廣東歌便走向沒落。「家駒離世對香港樂壇係一個好大損失，咁全面嘅音樂人，又唱得、又有視野，香港好少有。所以90年代中期之後，廣東歌越來越冇影響力。」填詞人劉卓輝說。
「家駒未離開過」
Beyond成員葉世榮旗下的本地三人樂隊Ever，在內地薄有名氣，他們也認同廣東歌市場大不如前，但他們不甘於只為人民幣服務。為了延續家駒的廣東歌神話，三人今年毅然逆流而下，重返香港。
「喺內地收入唔錯，但係做唔到我哋想做嘅嘢，就係廣東搖滾。內地公司要求我哋唱大路嘅情歌，我發覺呢啲嘢唔係屬於我哋。」Ever主音何家豪說：「好多人話香港樂壇冇得做，冇錢賺，但係我哋三個仍然喺今年年頭決定返香港，自資拍MV出碟。」
「我哋唔忿氣，廣東歌被人睇唔起。諗起Beyond嘅歌傳到內地北方都有人識唱，只要我哋堅持，總有一日廣東樂壇會再有人認同。」Ever三位成員本來就是年少時迷上Beyond才學夾Band，家豪說：「家駒過咗身20年，但係我一直覺得佢未離開過我哋。」