上周末到青衣走一轉，經過商場的地產代理，好奇望吓有否經典成語之際，立即有哥仔出來招待，介紹的並非附近屋苑，而是跨區樓盤。
聽代理講，現時區內公屋已叫價200萬元、居屋則賣300至400萬元，地鐵上蓋兩個樓盤，入場費起碼500萬元以上，還是超低層及面積500餘呎的。另一間代理亦好心相勸，與其買青衣樓，不如去別區更划算。
做agent做到咁，其實幾坎坷，明明在自己勢力範圍搵食，卻要去另一地盤搶食，好聽是適者生存，說白點是離X晒譜。
多謝CY，令5,000個「白居二」（白表免補地價購買二手居屋）名額，有一半本月釋放，令稍為歇息的樓價再度熾熱起來，多區公屋居屋樓盤相繼破頂，數日間就有新公屋王及居屋王。
多謝CY，賜給一群毫無買樓經驗的準買家十足勇氣，唔怕追價，最怕走寶，就算銀行估唔足價仍然去馬，獻出人生最有guts的一次。
多謝CY，可以令樓市抵禦美國退市及內銀錢荒的陰霾，就算是將軍澳靚地八折批出，翌日南豐廣場實呎破萬創新高。
多謝CY，可以厚顏自詡過去一年，在房屋及土地政策有13項政績，包括港人港地但央企插旗，最後極可能淪為豪宅。
白表準買家要三思
CY上任已經一年，任內連番出招壓樓市，結果是樓價繼續飆升15%，公屋變居屋價、居屋變屋苑價、屋苑升至豪宅價。連鎖效應下，豪宅率先乾塘冇人玩，中高價屋苑亦交投萎縮，市場只剩下所謂上車屋苑，以及居屋公屋市場可供選擇。97年樓市爆煲，高中低層有樓人士全部受創，今次用行政手段干預，表面上的確減少影響人數，但諷刺地，最沒有防守力的一群，爭相上車以買樓為一生目標的小家庭，卻可能在今次樓市狂潮中被淹沒，2,500個「白居二」買家，推高公屋及居屋價之餘，亦令整個樓市被歪曲。
過去一年，有關居屋王及公屋王的報紙報道達到440篇及100篇，當每個人都認為是理所當然、盲目接受，甚至連經紀有生意都唔做，要好言相勸的時候，信奉逆向思維的我，更感受到風雨欲來、要做好防風措施之感。
一開始聽「白居二」，還以為是甚麼詩人白居易，借用其著名的一首詩《長恨歌》作結尾，「天長地久有時盡，此恨綿綿無絕期」。希望「白居二」準買家能停一停，諗多諗，不要衝動。
股榮