7.1唔單止對香港人嚟講好重要，對莫耶斯亦都一樣，因為呢位曼聯新領隊將會喺周一（即係7月1日）正式履新。不過，據報莫耶斯上任第一日就可能會接到「見面禮」，就係前鋒朗尼同埋左閘艾拉都要求離隊。
𠱁唔掂朗尼就3億賣走
朗尼扭計想走嘅新聞，基本上雄霸咗呢個夏天嘅體育版，而莫耶斯喺正式上任曼聯領隊之後，就諗住動用之前喺愛華頓教過朗尼嘅舊情，嗱嗱聲勸掂呢名英格蘭前鋒，叫佢忘記同前領隊費格遜嘅不快，集中精神踢好新球季嘅賽事。
不過，莫耶斯嘅如意算盤就似乎打唔響嘞，因為據英國《每日郵報》報道，27歲嘅朗尼去意已決，仲打算喺星期一同莫耶斯攤牌；而另一方面，曼聯亦作出兩手準備，勸唔掂朗尼嘅話，就準備以2,500萬鎊（約3億港元）將佢掛牌。如果曼聯真係將朗尼掛牌，相信兩大英超球會車路士同埋阿仙奴都會立即出手。
艾拉不滿斟巴尼斯
喺未必挽留到朗尼嘅同時，莫耶斯仲要面對後衞艾拉扭計嘅問題。話說曼聯喺上周四傳出以1,200萬鎊欲羅致莫耶斯嘅愛華頓舊將、左閘巴尼斯一事，觸動咗32歲艾拉嘅神經。雖然，拖肥糖已拒絕咗曼聯嘅出價，但有指佢哋只係想將巴尼斯善價而沽，只要紅魔出到1,600萬鎊，佢哋就會放人。喺曼聯效力咗7年嘅艾拉，就覺得紅魔咁做好唔畀面佢，而且自覺仍然當打，唔想做後備，所以都打算離隊。據講，艾拉嘅前球會法甲摩納哥，就好有興趣以600萬鎊買番佢。
嘩！主力前鋒同埋後衞都喊走，我求大俠都戥莫耶斯頭痛。不過，話得說回來，如果佢今次順利「拆彈」，咁就可以立即贏得紅魔上下嘅尊敬啦！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange