85年亞洲小姐亞軍潘先儀，是當年發掘Beyond的經理人公司老闆之一，當年她跟Leslie Chan合作開公司，先後簽了小島樂隊和Beyond。潘先儀好記得在高山劇場首次看Beyond表演：「Leslie話呢隊band好好，叫我去睇吓簽唔簽佢哋，去到見家駒唱緊最後幾句rock & roll，我覺得佢好有魅力，好似有道光射出嚟，我睇到起晒雞皮，覺得佢哋成就會大過小島。」
後來潘先儀跟Leslie決定簽Beyond，約他們傾了數次，感覺好奇怪：「最初接觸佢哋後，我問自己係咪要再諗吓，佢哋台上台下兩回事，台下講嘢語無倫次，成日儍笑，見到有人跌低都講一餐騎騎笑，其實家駒同我同年，我見到佢就諗自己喺亞視拍嘢拍到死，你仲好似𡃁仔咁，點樣可以捧佢哋呢？傾約時佢哋好多主見，不停問好多問題，就算到簽約嗰日，佢哋仲喺度猶豫。」
家駒多意外
四子之中，潘先儀覺得家駒最有主見：「可能因為佢最大個，家強係細佬跟住阿哥，阿榮唔係好出聲，家駒有嘢會同Paul商量，所以我哋好多嘢都係同家駒傾先，由家駒說服佢哋，咁我哋先冇咁辛苦，佢哋四個一齊會變周星馳嘻嘻哈哈，一個問題可能傾兩個鐘。」
Beyond仍未出碟時，家駒曾不慎撞傷鼻樑，潘先儀說：「嗰日佢落的士撞埋搭棚支竹，因為落雨佢衝埋去，冇睇清楚就撞到鼻樑，嗰時仲未出唱片，嚇到我哋死，之後入錄音室就割扁桃腺唱唔到歌，但我哋真係好彩，佢割完扁桃腺有豆沙喉，成為佢自己風格，係上天賜畀佢。」
當年潘先儀為Beyond設計《阿拉伯跳舞女郎》造型，毀譽參半，她坦言：「好記得試衫時，家駒係主角一定揀先，佢揀咗銀色，佢哋覺得好得意，最頂唔順係頭飾，唔係好郁到，家駒只係唔鍾意短褲孭鐵鏈，覺得唔啱佢哋，面對唔到fans，我仲迫佢哋學跳舞，成日話佢哋跳舞好似踩死蟻，冇考慮佢哋情緒。」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！