我有我心底故事。阿Paul的步伐沒停下，05年寫成一曲《故事》記載Beyond精神，是要告訴家駒，他的音樂依然火爆。
今天一再想起你。世榮履行Beyond的音樂理念，將樂與怒精神薪火相傳。不過當踏進昔日band房，依然感到無盡空虛。
不經不覺裏獨行。家強已為兩子之父，處事成熟、責任心重，不再是從前的黃毛小子，陪着他的，是哥哥留下的德訓。
他主宰世上一切。潘先儀眼裏的家駒，是Beyond四子中最成熟一員，家駒獨有的豆沙喉，也是上天賜給他的最佳禮物。
今日是一代巨星黃家駒逝世20周年，無論過往幾多風雨，其身邊人一直堅守樂與怒精神勇敢活下去。你我霎眼抗戰20年，世界怎變，永遠都站在家駒身邊。
不會變。
撰文：余燕儀、羅美倫
黃家強：阿哥喺身邊最開心
既是樂隊好拍檔，又是家駒的弟弟，這雙重身份，思念之情也是加倍。
20年來，世界都變了，從前黃毛小子，現在的家強已變成大男人、兩子之父，多了一份責任，不能隨意輕狂，問到已有幸福家庭，現在是否20年來最開心，家強笑言：「唔係，希望將來最開心，阿哥在生時開心好多，𠵱家少咗個傾訴對象，以前我屋企有五兄弟姊妹，大哥，兩個家姐，我同家駒，返到屋企永遠見到兩個家姐雞啄唔斷，我同阿哥亦都講唔停，但𠵱家冇咗個伴，心情、心態都比較平靜，以前總係大起大落，開心就哈哈笑，唔開心就好down，如果佢仲喺度，我諗我會好似以前一樣咁情緒化、咁天真，佢喺我身邊，嗰種開心唔同，𠵱家係幸福，都係阿哥喺我身邊時最開心。」
回味兄弟情
與哥哥同在是最開心，但有個比自己更叻的哥哥，感受到的是光榮還是壓力？家強想都不用想便說：「好光榮！同佢生活咗30年，睇到佢性格，諗番起好多滋味，佢做人態度影響得我幾好，當係座右銘，當佢鍾意一樣嘢時，好似音樂咁，佢好堅持咁埋頭默默做，好集中專注，其實做乜嘢事都應該要。」
看到家駒的優點，家強不但視之為座右銘，他更因好兄弟之情，對兩個兒子自然要求要相親相愛，家強說：「阿哥對人好寬容，唔計較，呢個係佢交友之道，我都同兩個仔講你哋二伯係好叻㗎，我發覺大仔對節奏有啲天份，但太多嘢令佢分心，我唔一定要佢玩音樂，但就一定要學，音樂係一種修養，亦可鍛煉腦筋。」
【沒有家駒的日子】
93年6月30日
家駒逝世，終年31歲。
93年7月4日
親人為家駒於香港殯儀館設靈。同晚於高山劇場舉行「永遠懷念家駒」音樂會。
93年11月
三子承諾會繼承家駒遺志，繼續推出專輯。
94年
簽約香港滾石唱片，籌備新碟《二樓後座》。
95年
開始走向電子音樂。
96年3月
三子在紅館開騷，是家駒逝世後首個大型演唱會。
97年
《回家》是寫港人回歸後的心態。曲風開始走向印象派。
98年4月
到台灣參加了幾場校園演唱，渴望進軍台灣。
99年11月
舉辦《Good Time演唱會》後，樂隊暫停活動，成員作個人發展。
03年4月
三子為慶祝樂隊成立20周年，舉行五場演唱會，反應熱烈。
03年10月
傳阿Paul與家強不和。
04年
為《無間道II》創作主題曲《長空》，奪香港電影金像獎「最佳電影原創歌曲」獎。
05年2月
三子在紅館舉行六場演唱會後宣佈解散。
05年11月
香港郵政推出家駒郵票，面額$1.4。
07年7月
家強開騷，只請世榮任嘉賓沒請阿Paul。
08年6月
舉行「別了家駒十五載紀念展覽」。
09年7月
家強和阿Paul開騷，但世榮沒有參與。
前年
阿Paul為劇集《天與地》創作了《年少無知》，去年反國教集會，現場12萬人高唱此曲。
今年4月
家強承認Beyond年代已完結。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！