近年北上拍劇成風，不少藝人如鄭嘉穎、馬德鐘、胡杏兒和佘詩曼等紛紛北上掘金，但三哥大唱反調地說：「我都幾懶上內地開工，之前都有傾過，不過我會選擇性去拍，一來係離鄉別井，二來內地劇如果有好嘅角色，始終都會先照顧內地演員，搵我哋去拍，雖然錢係畀夠你，但係多數係陪襯，唔係主線，後生仔梗係冇所謂，可以試吓新嘢，又可以搵錢，如果係香港一線演員，酬勞真係好可觀，同香港嘅市場差好遠。」
生活富足不強求
三哥續說：「但係佢哋唔會好似TVB咁，專登為我去度身寫劇本，喺香港真係好方便，就算開工時間好長，但係收工做乜嘢都好方便，唔使走嚟走去，真係好好多。」笑指三哥有錢才可以這樣說：「咁又唔可以咁講，每個人喺呢方面嘅要求都唔同，我覺得夠生活已經可以，唔會無止境去要求。」相信最主要的原因，當然是方便三嫂戚美珍探班，三哥甜絲絲地笑說：「梗係喇，呢個係最主要！」
期待古裝好劇本
不過如果有一套古裝劇邀請三哥拍，或許會令他改變主意，三哥說：「其實我一直好想拍一套古裝，不過要喺內地，只要有好劇本可以吸引到我。如果喺香港拍，付出同收入都唔可以成正比，古裝係辛苦好多。」題材方面，三哥亦說：「題材都好重要，要睇吓你寫乜嘢題材，寫武俠歷史嘅又有唔同，我唔係好鍾意重拍武俠片，劇本嘅創作空間唔大，除咗拍古龍、金庸嗰啲之外，冇人可以再創作到；歷史劇亦一定要喺內地，佢哋劇本會寫得好靚，有機會咪試吓。但係時裝劇我覺得香港有優勢，時代感重啲，所以喺TVB我多數會拍時裝劇，就算喺內地播，佢哋啲點擊同反應好犀利，成績好好。」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！