【特稿】
2003年硬推23條惡法的保安局前局長、新民黨主席葉劉淑儀，昨日接受商台訪問回顧當年推銷手法時，直指自己當年言論「幾好笑」和「不夠成熟」，但她不認為自己要為當年激發50萬人7.1上街，以及推銷惡法失敗負上最大責任。
暗寸梁愛詩「冇乜講嘢」
葉劉又暗寸時任律政司司長的梁愛詩，不及當年陪她硬推23條的英國人、時任法律政策專員區義國「盡忠職守」，指梁愛詩自從「講錯嘢」，發表「把刀一直架在頭上」言論後，「（梁愛詩）再冇乜講嘢，之後得我出嚟頂」，令23條變成「葉劉淑儀條例」，透露自己曾在離開政府後，為當年慘痛經驗流淚。
對於2003年50萬人上街，葉劉堅稱「唔可以賴晒我一個」，指當年上街議題眾多，例如沙士、負資產等，「香港係疫埠時，好多人上唔到街，啲戲院冇人去、地鐵冇人坐，啲人屈喺屋企，（6月25日）一話唔係疫埠，就好多人上街」。對於硬推23條失敗，葉太不認要為事件負上最大責任，指主要原因是自由黨兵變（在立法會投反對票），「自由黨兵變，因為上街人數多」。
《蘋果》記者