【隔牆對論】
記：《蘋果》記者
朱︰土地正義聯盟朱凱迪、獲邀參與商討日團體代表
記：你在商討日傾過甚麼？為何最後得到的結論會這麼空泛？
朱：（空泛）係必然結果，我係好欣賞嗰次D day。咁多唔同層次嘅人參與討論，對上一次應該係（80年代）高山大會。其實我哋對民主運動嘅諗法，成日好似大佬諗咗就跟，冇乜嘢機會去諗清楚。89年後，成個民主運動進入咗選舉、代議政制，變成大佬化、山頭化。到咗2012年，佢哋同長期支持者慢慢脫節。（商討日）拉返民主派議員變番做一個個人，小組內，有人對住李永達嚴厲批評，大家都好坦承，冇一種好對立嘅感覺。
戴耀廷有一種好大膽假設，只要畀你傾，都係一種好吸引嘅動員工具。首個商討日後，證明討論原來真係有一種動員力。香港冇第二組人，郁吓可動員600幾人同你傾民主，佢哋已變成唯一有公信力可判斷乜嘢方案，可成為大家共識。呢個平台其實好重要。
記：你心中的政改方案是怎樣？
朱：我其實冇諗呀。對我來講，唔係要諗一個方案囉。世界各地民主運動，唔係純粹只講點令遊戲規則變得公平咁簡單。係講緊一班喺政治體制下被剝奪權利，生活得好差嘅人覺醒，覺得可透過政治體制改善，令權利得到改善。香港𠵱家問題係商界食政治免費午餐，有錢人喺立法會、行會壟斷政策討論，變相令好多有利於大眾嘅民生議題被扼殺、拖延。我哋講商界可一齊參與，提「放心論」，係又呃唔到商界，又呃唔到北京，但就會令好多市民冇咗投入感。結果咪北京喺政治動員上越來越成熟，從而會喺立法會得到大多數，對一般受苦香港民眾係冇改變。民主運動唔係純粹要令遊戲規則變得公平，仲係同生活息息相關，要為普羅市民打破目前嘅權力關係，為香港爭取更大嘅自主權。
記：民主運動除了佔中以外，你還有甚麼想法？
朱：我諗緊𠵱家主流民主派嘅意識形態，開始失去吸引力，受本土派、左翼挑戰。泛民唔可再迴避，到底爭取雙普選，香港同北京關係需唔需要產生變化？你點去面對本土派？本土派可以拉到好闊，引台灣資源，話民主必須先立國至有可能，佢哋可以開到咁大喎。
後生仔、網民，本土派𠵱家好有鬥志，可能佢哋仲唔知自己要乜嘢住，總之有乜嘢就打咗你先。由𠵱家到2016係佢哋作戰時期，佢哋會不斷作戰，打冧民主派陣地，確立𠵱家仲未清楚嘅政治路線。我哋𠵱家係咁混亂情況，唔可以單單憑佔中（解決）。
例如一國兩制，（年輕人）過去冇機會參與中英談判、草擬《基本法》，但（香港人）身份問題，政治上可以點決定自己命運，年輕一代，冇八十年代嘅經驗，唔會話當年咪簽晒（聯合聲明）囉，你推翻咪即係搞革命。後生仔，只係有反對嘅可能。面對大山，佢哋惟有打，打嘅同時，佢哋會諗一啲wild嘅嘢。諗得好wild嘅人，係可以好深思熟慮，重新設計過香港政制。
記：03年7.1的50萬人上街，與萬人佔中比較，哪個效果會更震撼？
朱：如果真係有一萬人走去佔中，效果肯定勁過03年7.1。因為佢唔會只係1萬人嘅事。一個政權，唔係我哋想像中咁強大，埃及搞掂穆巴拉克要幾多人？幾千萬人口，喺自由廣場最多咪50萬人，但你趕唔走喎，個政府係會冧㗎。
記：但香港人多年來習慣了「卡拉OK式政治」，極懂計算，只會安全範圍下爭取。
朱：香港人其實既務實，亦激進緊。我哋成日問：你夠唔夠膽搞一樣收唔到科嘅嘢？冇諗住收科，先會令你對手產生一種意想不到嘅壓力，之後佢先會諗，一係隊冧你，一係就要讓步。都係duo power問題，鬥爭，冇辦法唔係咁思考。點解北京咁驚佔中？穩定社會、中產群體都要孤注一擲，會否成為燎原大火？如果預咗好快完咗件事，正正係場K唱耐啲，如果北京知道咁，更加唔會讓步。如果香港人想贏，第一，要令到唔同階層覺呢件事同自己相關、同未來密不可分。第二，行動上，唔應該覺得只係表態式行動，而係要透過阻礙現時社會運作，從而產生政治壓力，迫當權者讓步。
佔中，如果大家理解係一個阻礙城市運作嘅行動，實質上，佢就係一個香港市民大罷工、中產階級大罷工，去爭取我哋未來決定自己命運權利。對我哋社會運作好重要嘅人都離開自己工作崗位去參與，咁就勁啦。
如能夠係中產階級主導自由民主運動，最後令中產階級激進化，做一些意想不到行為，例如中產階級罷工，帶來好大政治壓力，導致好大讓步，呢個讓步得到中產階級認可，成為一個終極方案，呢個係有可能發生。
mailto:[email protected]