今季重返甲組嘅東方沙龍，前日喺甲組會堅決唔用城門谷做主場後，噚日再入信足總，申請大球場做主場。總監梁守志話，絕對唔敢同南華爭，只係唔希望球迷山長水遠去到荃灣捧場，先諗共用大球場啫。
梁守志：方便球迷睇波
港甲新一季隊數增到12隊，我求大俠除咗覺得唔夠球員用外，球場亦要爭餐飽；先前已經爆咗8隊爭旺角場嘅奇聞，最後董事局話按排名分配，結果愉園同東方分別被編排到小西灣同城門谷，前日喺甲組會傾仲差啲搞到不歡而散。
肥佬梁噚日話，因為無法接受入「城」呢個安排，又冇可能用旺角場、深水埗運動場，而按足總新季編排，大球場只得南華一隊，亦冇話淨係南華先用得，希望可以方便球迷睇波。
愉園「大」「小」都唔要
我求大俠記得南、東呢兩支老牌球會，喺90年初鬥到你死活，新季未開波，又搞單東方踩上大球場事件。不過肥佬梁強調，南華係甲組冠軍，東方以乙組第3名升班，邊有得爭？要爭都喺比賽度爭啦！所以只希望足總同大球場方面，考慮好似旺角場咁，容納兩支甲組隊做主場；如果可以，南華喺賽期編排會優先。而羅生未有就東方想共用大球場呢件事回應。
而愉園總監鄺曉明都話，已入信足總拒絕去小西灣同大埔運動場，因為球隊想做多啲地區工作；如果半季喺小西灣、半季喺大埔，都唔知點落區做嘢。求大俠估計，主場事件最快要到下月17日董事局先有結果。
另外，愉園噚日公佈組軍大計，呢支班費超過500萬港元嘅乙組亞軍，新援暫時只係傾緊一個前巴拉圭國腳中堅，其餘全部未定，即係要靠盧加路、賓曹同亞古沙等舊援，配合蔡國威、楊賜麟等華將支撐，就算搵到個阿根廷教頭沙治奧（據聞𠵱家係阿甲沙士菲教練團成員之一），都幾唔樂觀；難得鄺sir仲話有信心爭取第5或6位，大家拭目以待囉。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange