鄭嘉穎賺人仔賺到笑，半年使三千萬喺香港同美國狂掃三層樓，全部送畀媽咪同家姐，真係孝順。梗係啦，當年嘉穎經歷事業低潮，喺台灣過住非人生活，全靠阿媽對佢百分百支持，先至度過難關，淨係呢份恩情，嘉穎已經緊記於心啦。
嘉穎93年出道嗰陣，都風光過㗎，食正當年唱片興旺，出過六張唱片，隻隻閒閒地都兩、三萬銷量，之後仲同寶麗金小花王馨平拍拖㖭。少年得志，結果變咗語無倫次，使錢好似倒水咁倒，完全唔識儲番個錢。之後幾年，佢轉戰台灣發展，先知大件事，冇機會發圍，最後搞到捱杯麵度日。王馨平老竇王羽嫌嘉穎冇出息，仲棒打鴛鴦，兩人最終00年分手。一下子乜都冇晒，嘉穎唔down就呃你啦，不過呢段最黑暗日子，全靠有阿媽支持。01年，嘉穎返無綫，放棄歌星身份，改變少爺仔脾氣，一切重新開始。終於一步一步咁捱出今日嘅成就，但講到尾，最重要都係有媽媽喺背後支持啦！
撰文：阿Wow
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！