【銅鑼灣時代廣場】資深喜劇笑匠吳耀漢個仔吳嘉龍，專心喺香港發展演藝事業，不過似乎佢嘅愛情事業發展得仲好。之前傳過佢同鬼聲鬼氣嘅貝安琪拍拖，最近又同另一位貌似貝安琪嘅女仔行街，睇嚟佢對呢類型嘅女仔情有獨鍾。
5分鐘下火
日前下晝5點鐘，吳嘉龍同一位貌似貝安琪嘅外籍女子去咗銅鑼灣選購化妝品。嘉龍帶住翻版貝安琪去到時代廣場地下間連卡佛行街，翻版貝安琪一見到化妝品就連老竇姓乜都唔記得，丟低身邊嘅吳嘉龍唔理，嘉龍就漫無目的咁一個人行。當佢行到另一化妝品牌嘅檔口時，位化妝小姐認出佢係明星，就好落力咁推銷。吳嘉龍見有靚女送上門，即刻發揮口才，𠱁到位化妝小姐笑晒！
不過，吳嘉龍同化妝小姐開心唔夠5分鐘，翻版貝安琪殺到，見佢黑口黑面咁就知唔滿意吳嘉龍撩女仔。嘈咗一陣之後，翻版貝安琪行開，吳嘉龍就落咗地庫行超市，最後佢都死死地氣返去𠱁女友。佢帶咗翻版貝安琪落地庫，用雪糕攻勢一杯兩份食，唔使5分鐘就𠱁到女友笑番，不愧係笑匠個仔。
採訪、攝影：梁繼光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange