對於一個「電視撈飯」的人而言，是次訪問，絕對驚喜。做慣大俠、有型警察，人稱三哥的苗僑偉，印象中他每次都會一絲不苟的打扮型爆示人，近年還加插了chok爆甫士，不過今次一反常態，一身casual的打扮，在極具陽光的海邊食肆進行訪問，或者正如三哥所講：「最緊要好玩！」
撰文：何慧斯
今次三哥苗僑偉在被指為無綫救亡劇《好心作怪》，飾演一個很霸道、鍾意沽名釣譽的生意人，因黃宗澤（Bosco）的角色意外死亡，三哥從一個好人身上移植了心臟後，竟然變得善良，他亦與Bosco的未婚妻周麗淇（Niki）產生微妙感覺，引起太太萬綺雯的猜疑。
嫌棄再演警察
過往三哥所拍的電視劇，收視方面都有好成績，加上今次找來萬綺雯、黃宗澤和周麗淇演出，難怪外界視為救亡劇，三哥說：「唔可以話救亡，呢啲全部係公司安排，我相信擺邊套劇喺呢段時間播，大家都會咁講，呢次只係咁啱得咁蹺。當然，《好心》嘅娛樂性豐富啲，又好少呢類題材，我自己都有信心，唔會有壓力。」
三哥笑說：「今次係一切從心開始。成套戲有啲黑色喜劇包裝，幾特別，同我以往拍嘅唔同，我相信喺醫學角度上，唔會有呢啲事發生，不過喺某程度上，我覺得會有啲不期然嘅嘢走出嚟，真係好懸疑。」
從80年代開始拍劇至今，見慣世面的三哥，又怎會受這些不能控制的因素影響，現階段若非題材特別，相信未必可以吸引他，他笑笑口說：「唔係咁講，話晒拍咗咁多年戲，做過好多唔同類型嘅角色，都要諗好多嘢。𠵱家基本上每年幫TVB拍一套劇，佢哋都會諗有乜嘢啱我做，不過我都覺得幾難諗，好似《學警》呢類型又拍咗幾輯，警察又做過好多次，仲有啲乜嘢可以玩呢？」
三哥續說：「今次呢個特別啲，好過癮又好好玩，講我換咗心之後對我嘅影響，作出嘅改變，所以前半段觀眾會覺得幾好笑，後半部嘅感覺會heavy啲。如果你問我，我鍾意前半段多啲 ，唔單止角色見到個演繹方式有轉變，我又唔使再做差人，捉住啲人喺度走嚟走去。」
挑戰寫實角色
作為一個演員，最開心當然是可以收到一個有新挑戰和新嘗試的劇本，但相信最令人羨慕的，莫過於他可以選擇喜歡的工作，吃喝玩樂又可以隨心所欲，難怪他笑說：「所以我覺得做嘢嗰陣會好開心，最緊要好玩！」
三哥透露下半年無綫會為他度身開拍一部新劇，提到今次的題材，他說：「詳情未知，初步知係一套貼近現實嘅劇，講香港嘅金融市場，類似華爾街嗰啲，貼近打工仔嗰層，但係我未知做乜嘢。」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange