獨立電影導演盧鎮業，作品一直關注社會邊緣群體。上月初的藝發局頒獎禮，他領獎時乘機讓參與工運的碼頭工人阿四上台發言，批評政府在工潮期間辦事不力；搞寸派對，背後無非喚醒在坐諸位：藝術源自社會。
誰想到盧鎮業十年前是另一人。甚少參與社會政治，大學時代修讀電影，以為畢業後到無綫當PA，差點淹沒在主流。如今他覺醒，藉文化層面介入政治，冀一點點衝擊受眾，引發反思，繼而投入社運，為迎接一場世界變革做準備。
撰文：蔡濃志
攝影：許有達、蔡家輝
（部份圖片由受訪者提供）
政府推藝術 表裏不一
細看盧鎮業（小野）輪廓面相，眼細、單眼皮、笑時腼腆，略帶儍氣，似鄰家男孩多於社運分子；或許如此，他在台上領取「藝術新秀獎（電影）」時才能臨場發難，讓阿四來到台前，殺藝發局個措手不及。其實早於半年前，藝發局來電問他是否接受提名那刻，他已決定搞這場大龍鳳，最初計劃與幾位同獲提名的藝文界友好領獎時一起行動，豈料最終只有自己獲獎。「公佈結果嗰陣就知瀨嘢！」
頒獎禮前兩星期，眼見碼頭工運仍未完結，小野和朋友靈機一觸，將馬龍白蘭度1973年杯葛奧斯卡頒獎禮一事照辦煮碗，當年馬龍憑《教父》奪影帝，讓人權分子Sacheen Littlefeather代領及發言，藉以控訴美國電影業歧視美洲原住民。
「騎劫」頒獎禮片段即晚於facebook瘋傳，網民擊節叫好，但小野承認從公眾層面出發，此舉意義不大，但總算向本地藝術工作者展示一個訊息，「想話畀佢哋知，藝術本質無辦法離開生活同社會。」藝發局以獎項讚揚藝術工作者，反過來令他們脫離社會，「我見唔到藝發局表揚咗呢啲人，藝術發展會好咗。佢哋將來可能變『精英』，之後越爬越高，作品越玩越high，唔記得佢哋最初嚟嘅地方𠵱家變成點。」
更甚者是向政客靠攏，比藝圈精英化現象更差。去年梁振英競選特首期間，有本地藝術家參與其形象設計工作，但對方竟說此事跟政治無關，「咁講好不負責任，以自己嘅創作力為CY包裝形象，等於佢自己向市民推介CY，CY𠵱家做到特首，佢又點能夠話自己無份呢？」
政府推廣本地藝術表裏不一，亦見虛偽，像「起動九龍東」加快區內轉型，廠廈改建令租金飆升，不少剛投身創意行業的畢業生，為捱貴租於區內開製作公司，只能妥協，密密接商業性工作，創作時間變相減少。「政府引導出嚟嘅呢種生態，搞到好多人畢業出嚟做唔到藝術創作，然後就話大家好辛苦，頒個獎畀你，話係榜樣、精英，成件事好虛偽，頒呢啲獎好無謂。」
十年轉變 幾個女人
現在的小野，既是獨立電影導演，也是社運分子，積極關心社會議題及邊緣群體，但十年前他對政治、社運及電影幾近完全無知，03年七一50萬人上街，他質疑。「我嗰陣時都仲有『咁樣出嚟遊行有用咩？你都要畀機會政府』呢種諗法！」
十年後，小野判若兩人，促使他轉變的關鍵人物恰巧都是女性。大學老師許雅舒是獨立電影導演，3年前建議他將講述五區公投的劇情短片《春夏之交》拍下的片段製成紀錄片《那年．春夏之後》參展，記錄公投期間某些人的社運步伐，「搞社運係關注邊緣化嘅人，但其實佢哋本身都係俾人邊緣化。嗰陣時先覺得自己係一個導演，開始去理解獨立電影。」
女友是其二，她是學聯副秘書長何潔泓（Willis），因碼頭工運榮升「社運女神」，他倆在守護菜園村時認識。「我同佢參加社運唔係純粹為拍拖，我哋係同行者，經驗係共同擁有，會互相分享諗法。」Willis經常置身社運前線，小野從旁提點，亦提醒她要判斷遭拘捕的成本，「同愛港力衝突搞到俾人拉就唔值啦！」
由不參與社運，到懂得分析策略，轉變的原點，得由那些年的中學會考說起。
第一年會考僅十分，當時小野跟一位女同學過從甚密，他追求多時，雖沒一起，但她的話猶如明燈，令小野最終決定自修，考獲17分，升讀預科，遇上教中國語文及文化科的女老師，她負責六四周會廿多年。「年年搞，全校學生都去，先知原來六四係咁勁揪！」那位老師着小野將六四片段剪輯播放，看着零碎的片段，小野兩眼發直，「對我嚟講成件事真實咗好多，一具具屍體喺螢幕出現，係要好直接咁面對佢哋。」其後老師還帶他和其他學生出席維園燭光集會，第一次在場，心情激動，「心態上覺得我終於嚟過一次，係好shallow（膚淺）嘅，第二年已經無去。」
預科兩年，校內老師經常讓他參加短片比賽，中七高考前夕，他和幾位同學參加環保短片比賽，冠軍可以去日本交流，「所以就算考Mock在即，大家都為呢個目標狂chur！」結果勝出，如願到日本。「當時其實唔係特別有興趣或者熱愛拍片，但呢個經驗令我知道拍嘢有機會成為我謀生嘅工具，因為我成績唔好。」
為愛情 放棄幕前
謀生，是昔日小野選擇人生路向的路標。高考前夕大學揀科，首選護理學，我很詫異。「因為要搵錢！」及後成績出來，肥了一科物理，加上早前拍片得獎有所啟發，最終入讀城大創意媒體副學士課程，累積鑑賞和閱讀電影語言的能力，但拍片對他來說仍是功課，畢業前自導自演一套關於六四的短片《打還打，唔好打頭》，事後有同學輯錄成碟，送給電影業界，讓他遇上麥曦茵，「係許雅舒老師畀隻碟佢嘅，佢認出我有份拍《前度》，又覺得套講六四短片對佢好震撼，最後先知我就係導演！」
機會來了，為麥曦茵執導港台劇集《幸福的旁邊》，講姊弟戀，小野飾演男主角「表弟」何彥君，女主角是楊淇，勇敢求愛的「表弟」甚搶鏡，播出後瞬即擁有一班女粉絲，小野笑指在粉絲眼中他與韓星屬同一類，「有次喺朗豪坊行街，無啦啦廣播話要緊急關閉，嚇死我，問人先知韓國《Running Man》（RM）嚟拍節目，跟住遇到個擺明係等緊《RM》嘅妹妹，佢望住我話：『嘩，盧鎮業呀！』。」
幕前跑出，港台邀拍劇，蒸餾水和信用卡邀拍廣告，他卻統統推掉，因Willis對此不滿。「插到我飛天，唔鍾意我做明星，唔鍾意我可能成為一啲女性嘅性對象，即係妒忌！」知名度畢竟存在，小野說他的粉絲因此去看他的獨立電影作品，「喺內地好犀利，佢哋係有一堆人唔係睇完就算，係會form一個group交流，從而關注多咗內地社會、政治同經濟，呢種文化資本同公共性，我係覺得舒服嘅。」
取社運棄長工
為愛情棄當演員，社運與打工，兩者都要長時間投入，他又如何選擇？去年年初他加入香港衛視，製作專題節目《移軸人生》，兩個月後遞信。「我覺得自己應付唔到咁密集嘅工作，頭兩集好有火去搞，去到第二個月中後期已經跌watt。」幾百萬未開頭？實情父親巴不得他安安穩穩有份工。父親曾借題發揮，叫他兩年事業沒起色就得找工作；訪問當日，小野在城大創意媒體學院的短期教席剛好完結，「呢半年喺城大教書好開心，𠵱家教完喇，佢（爸爸）嗰種渴望你搵工嘅樣又會走番出嚟。」
父親在建築物料公司當推銷員，母親亦有正職，小野剛出世的日子，兩口子打工，本屬小康，後來弟弟出世，4歲時不幸罹患出血性腦中風，好轉又再復發，至20歲仍要做手術，這段日子對盧家衝擊極大，「呢件事對阿媽嚟講係幾折磨，細佬出事無耐佢就辭工，得番老竇養家，醫療費好貴，所以望落去就小康，但由細到大，感覺上經濟都唔係幾好。」
父親當年無得揀，小野慶幸現在可以走自己的路，而他的改變，某程度上是為未來世界一場變革做準備。「世界各地有好多新嘅社運方法，係為咗呢個變革嘅出現做準備，我利用文化介入政治，希望令佢哋反思，當衝擊不斷累積，佢哋自然會行動，投身運動，加快變革出現。」