後日的7.1大遊行，其中一個主題是「佔領中環、蓄勢待發」。本月初首場佔中商討日，有參加者提出佔領機場、討論是否需要進行變相公投……但大會最後只歸納出加強宣傳、組織等極度空泛的七大議題。究竟，參與者對佔中是觀望？是懷疑？
自發到商討日的中產劉先生認為，要動員萬人佔中，先要讓市民認識到民主對改善民生有何實質好處。佔領之前，先要發動罷交稅、抵制中資銀行。
社運人士朱凱迪就點出，佔中一旦成事，其實是一場中產階級大罷工，以爭取港人決定自己命運的權利。問題是，香港人：「你夠唔夠膽搞一樣收唔到科嘅嘢？」
商討日後，7.1之前，兩人隔牆再論關於佔中的想像……
記者︰白 琳 雷子樂
中產人士劉先生 民主民生須緊扣
記：《蘋果》記者
劉︰半退休中產劉先生、自發參加商討日市民
佔領中環行動首個商討日早前舉行，是香港首個同類型讓市民體驗直接民主的活動，不同階層的參加者來自各行各業，商討後各有想法。目前離明年正式佔領中環尚有一段時間，有參加者擔心整個運動太脫離群眾，難獲社會大眾支持。
記：你滿意佔中商討日的形式嗎？會否覺得七大議題太空泛？
劉：正式討論得個幾鐘，我想傾吓佔領行動有乜嘢concern，點將民生、民主、佔中扣連，都冇時間。佔中三個發起人有兩個係學者，我擔心將佔中變成學術研討。佢哋成日強調商討日係全世界第一次，好似好開心咁，我驚當係民調加focus group嘅qualitative analysis咁搞，同一般群眾脫離就弊。群眾民主運動嚟講，佔中喺推動市民參與同宣傳論述方面都做得唔夠。
記：佔中發起人以「傳道者」自居，商討日尾聲又搞大合唱。你會否覺得太似佈道會而產生反效果？
劉：佈道會純粹係形式問題，我唔反對。香港好得意，民主好似宗教咁，你信就信，有啲人唔使點講都明，有啲人坐低聽你講幾粒鐘都未必肯一齊爭民主。喺英美澳，民主係空氣，覺得冇民主係唔可能。喺香港，自由先係空氣，但係啲人又唔會諗，如果一路冇民主，將來自由都會冇埋。搞佈道會，至少多一個機會去喚醒一啲人。
記：佔中如何吸納中產支持？
劉：我八十年代港大畢業，朋友有工程師、老闆、上市公司董事，或者做官，大家成長過程都係冇民主，對民主冇強烈渴望。好多香港人覺得，我有嘢做、有飯食、有錢就夠，民主唔係咁重要。朋友聽到佔中就話：「你去埋我嗰份！」佢哋管教小朋友已心力交瘁，返工時間又長，唔會反對你，亦唔會積極行動。中環啲人覺得你好多餘，阻住佢返工。
其實中產對香港歸屬感係強，講起社會問題，個個都好氣憤，但係覺得理唔到咁多。我個醫生朋友成日話公立醫院點樣慘，佢就選擇唔撈，出來掛牌，問題依然存在。呢種無力感影響唔到真正生活，香港又未去到最差，說服佢哋有難度。呢班高學歷中產需要再教育。佔中論述好緊要，一定要將民生同民主扣連，要解釋民主對人有乜嘢實質好處，每個人手上一票對未來有乜嘢影響。
香港人素來以遵守法律、嚴守秩序自豪，走上街頭佔領中環公民抗命，對大部份人來說是個大挑戰，不只是良心的考驗，也有很多實際的考慮，香港人願意為後代爭取活在一個民主自由的社會付出多少代價，是佔中成敗關鍵。
記：佔中是否要等到香港經濟大蕭條才能成事？會否太被動？
劉：除咗時機，仲要睇你做幾多嘢。通常啲人信教，總係有事發生喺佢身上，啱啱有人同佢講開基督教或者民主，突然嗰吓就click到。佔中就要集中郁呢班marginal嘅人。當政府做得越來越差，有可能信民主嘅人就會越多。例如公務員，舊年未必聽你講，今年加薪咁大障礙，你𠵱家同佢講民主，佢就會發現呢個政府真係好唔掂，民主可能真係重要喎。
記：佔中成功要素為何？
劉：佔中唔可以有灰色地帶。好似李柱銘個方案，只係確保泛民入閘，市民可能只係想投余若薇，就覺得OK，但係我接受唔到。總之方案一定要冇政治篩選，否則就冇凝聚力。
共產黨可能想拖住你，削弱佔領嘅動力。如果出年7月都未諮詢，咁你反乜嘢呢？我哋要話畀市民聽，佢咁拖法即係冇喇，更加要佔中。我唔驚，最多俾人罰錢。幾萬人佔中，佢拉得幾多？落口供都有排落，監獄都唔夠位啦。我哋唔係想感動共產黨，而係話畀全世界聽，佢係唔啱。
香港沒有全民公投法，年前的五區公投備受爭議，是成是敗經驗尚待總結，佔領中環是史無前例的大型公民抗命活動，最終目標是向中共爭取普選，明年佔中進入關鍵時刻，行動會如何發展，現時難以估計。
記：你認為佔中達到甚麼效果才算成功？
劉：根本唔使搵幾十萬人佔領，成唔成功在於全民方案有幾多人投票。當年五區公投死喺「起義」呢句口號，香港人唔會咁極端，時間醞釀又短。今次用愛與和平，我覺得OK。佔中需要多個工作小組，喺佔領之前做其他嘢，例如呼籲人唔交稅、抵制中資銀行，一步步升級，當保守嗰班見到你哋做咗咁多嘢，政府都唔理，就拉到佢哋企喺你嗰邊。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange