近排大家最驚就係內銀拆息風暴，為咗嚴懲唔聽話銀行，拆息市場立立亂阿爺都唔放水。市場主流諗法係阿爺要整頓金融系統，但要整頓到恐慌就怪怪哋，起碼說服唔到晉佳，但呢個moment，條街大把人信，如果之後發現個故仔有更驚人嘅情節，咁就大件事。
回帶睇番金融海嘯，係人都知由雷曼兄弟倒閉觸發，事後國際銀行都驚對手係第二間雷曼，融資市場幾乎癱瘓，政府要向每間銀行check清楚條數有冇出事，又入股唔夠錢嘅銀行，最後美國更出QE擺平件事。
近排內地拆息市場情況同海嘯時有啲相似，唔同之處就係內地大嗰批銀行有阿爺持股，細嘅照計同樣有阿爺贒實，按道理隨時有權去睇番盤數，銀行有冇藉口要隱瞞呢？舉個例，如果有銀行職員身有屎要收埋某啲還唔到錢嘅罪證，都寧願保命都好過保住銀行，隨時成為隱瞞某條大數嘅導火線，真係唔好話冇可能，呢種事通常爆開有條路。實情係，銀行之間條數唔透明，所謂影子銀行規模，外界以至阿爺係咪一定摸得通？
減磅換馬二三線股
股市點都有靠估成份，但就要人性啲去估。掉番轉講，如果只係因為阿爺整頓而令個市下跌，港股值唔值得一個月跌成4,000點？有冇必要喺大國企有持續盈利、高股息之下，H指都跌到1.1倍市賬率？究竟有春江鴨知道大件事沽貨？定係純粹個個以為大件事，其實最後冇事？𠵱家有人同你講，話中港股市因為阿爺整頓金融體系而下跌，冇爆煲風險，都最好咪信，民行（1988）呢類風眼股最好先換走。
前兩日期指挾上得咁急，晉佳都唔信反彈浪咁快玩完，應該會chok住咁彈，藍籌以至二三線股，短期內應該會有更高位脫手，但要預備可能出現嘅恐慌性拋售，到時跌起上嚟都係蝕到嘔；講反彈，二三線股似乎行得快啲，持有大量藍籌嘅投資者倒不如減磅，換馬去流通性同波幅較大嘅二三線股，同時持有部份現金打吓底。
晉佳
本欄逢周一、三及五刊出