市況一如所料繼續反彈，噚日推介嘅彩星玩具（869）埋單升近9%，但令唐牛耿耿於懷的，係一直睇好嘅富士高（927），全年業績令人大失所望，股價單日插水26%。截至今年3月底止，全年收入16.1億銀，按年增長22.9%；盈利1.1億銀，增長102.5%。但如果拆開上下半年睇，下半年盈利僅4,620萬銀，按半年急插32%，毛利率亦跌逾3個百分點。戴咪耳機及音響耳機業務，按半年計增長明顯放緩，成為業績死因。
至於股價勁跌，末期息減少肯定係其中一個致命傷，集團末期連特別息共派12仙，較去年同期少兩成，全年計則微增5.6%。唯一慶幸嘅係，財務狀況依然穩健，手頭淨現金達4億銀，相當於市值逾三成。
以現價2.83元計，市盈率10.1倍，重返合理水平，息率6.7厘，尚算吸引。睇圖表，富士高依然守住舊年6月以來嘅上升軌，以噚日跌勢之急，相信好快會有技術反彈，要重拾升軌，則需要新嘅催化劑支持。
唐牛