唔知仲有冇球迷記得安察洛堤曾經有「千年老二」稱號。因他出道時由96年執教首間大會帕爾馬，到兩年後教的祖雲達斯，兩次在聯賽皆屈居亞軍。01/02球季轉投AC，多得球會的耐性和包容，令他終贏得兩屆歐聯和一屆意甲，一洗「千年老二」污名。但真正響朵的，應該是在09年轉投車仔，首年即贏得英超和足總盃雙料冠軍。
計埋上季PSG，肥安近10年執教的所有球會都有冠軍落袋，由「千年老二」變為冠軍保證。肥安有3個優點，第一是善用老將。在AC年代，他能令馬甸尼、哥斯達古達合組的老人防線，加上施多夫、岩布仙尼等老將戰無不勝；在車仔，他亦能將泰利、林伯、波歷克等發揮出最佳水平，但這優點在新東家皇馬可能派不上用場。
第二是善於被老闆搓圓撳扁，唔識波嘅老闆指指點點，肥安通常都能照單全收，兼且保持戰績，這特質在皇馬絕對適合！最後是陣式多變，由AC講求中場控制的4-3-2-1聖誕樹陣式、到車仔機動化的4-3-3；上季在PSG又偶爾用回傳統平衡4-4-2，戰陣變化多端。意大利球員自小習慣緊遵教練指示，到自己升任教練後往往因此得益。肥安開出為皇馬第10次奪歐聯的宏願，如果球會有耐性，起碼完成3年合約，肥安應該有頗大機會兌現承諾。
方柏翹
now足球評述員