「三百萬爽組合」今日玩完計數，按走勢，財經專欄作家周顯有機會贏走肥佬黎大約90萬元。追開嘅讀者唔使失望，事關《蘋果》搞緊個手機版投資擂台，最快今年9月有消息，到時有機會全世界一齊玩，人人都可以成為大師。
周顯呢季憑住一隻宏通（931）贏到開巷，佢個組合噚日收市贏61%，除非今日細價股出現大股災，又燒到佢個倉，否則可以話贏硬。
周顯贏咗 請食海鮮
佢估計，贏走嘅錢喺肥佬黎嘅「射程範圍」，唔算好多。佢已經喺香港仔魚市場一間海鮮餐廳訂咗枱，打算招呼一班好友，呢間餐廳好巴閉，唔做晚市，食開灣仔福臨門嘅周顯，指定要食呢間，應該真係有料到。