周初內銀股跌到反肚之際，擁有時間廊同眼鏡88的寶光實業（084）都出現跳崖式下跌，放榜日暴瀉8%，因為全球經濟放緩、租金上升，全年賺少7%，點知隻股翌日竟然爆升兩成，玩跳彈床，就真係呃晒所有人。
過去寶光以舖海戰術將自由行一網打盡，租金太辣同強國客消費減弱，冇影響就假，但Samantha認為現水平仍值博。話說舊年寶光向江澤民長孫持有的博裕資本發行3.7億CB，條款要寶光在2015至2017年，至少兩年純利超過4億元，又或者三年賺超過10億元，如果唔係贖回三成未償還債券。
寶光2012年大賺九成，純利只不過2.5億元，在中國經濟減慢下，咁harsh的條款都肯制，相信揸旗的Joseph都好有信心。佢哋想將時間廊定位為強國主要銷售平台，贏呢一仗冇退路可言，首先要請「中國通」睇住大陸檔生意，有券商話已請到猛人；第二揀啱銷售網絡，最慳水慳力當然係透過併購，各位不妨買定離手，靜候佳音。
Samantha
本欄逢周三、五刊出