今年7.1，前政務司司長陳方安生會第九年與香港人一起，從維園出發，走上爭取民主的大道。她昨日接受本報訪問，闡述自己過去八年的心路歷程，並說明7.1大遊行的意義與力量。
記：記者 陳：陳方安生
記：今年7.1，你會再次上街，點解要咁堅持？
陳：首先，大家見到政府就政改一拖再拖，毫無誠意，無論啟動諮詢程序，或者凝聚社會共識。冇社會共識，就好難制訂出一套大部份香港市民可以接受嘅政改方案。大家亦都可以睇到，呢幾年，越來越明顯嘅一個事實係咩呢？就係當一個行政長官係冇市民授權，換句話，唔係透過普選選出來，而由一個小圈子選出來嘅行政長官，係缺乏認受性。無論呢個行政長官幾有能力、幾有本事，佢施政方面都會好困難。
何況今時今日，我哋面對嘅現實就係，社會越來越分化。行政長官未有改善行政同埋立法機關的關係，相反似乎係加劇了社會嘅矛盾同埋分歧，繼續有親疏有別嘅政策、用人唯親，凡此種種，香港市民越來越覺得不能夠接受。所以先見到今時今日嘅民意調查，多方面市民都不滿意；無論係講經濟、講民生，或者係講政治。
所以我覺得7.1係一個好好嘅機會，畀香港市民用行動去表示佢哋對特區政府嘅不滿。特別不滿嘅就係親疏有別、用人唯親，施政往往出現問題。亦都涉及行政長官同一眾高官嘅誠信，如果誠信受到質疑，市民唔信任特首或者某啲高官，凡係政府推出來嘅政策，無論用意係幾好，市民都會用最壞嘅角度去睇。咁樣落去，特首應該了解，佢嘅施政方面，一定係舉步維艱。
記：你覺得民主普選，對政府施政同改善民生有幫助嗎？
陳：𠵱家我哋面對嘅問題係，點樣嘅一個政治體制，先至能夠令到特首，無論呢個特首係邊位，令到特首同埋佢嘅團隊，可以有效咁樣管治香港。我一向都強調，民主同良好管治息息相關，民生問題得到解決，都係同市民參與、有冇民主係息息相關。
建制派成日出來講，市民關心民生，唔關心政改。最近鄭耀棠仲更加莫名其妙，話唔好推政改出來，一推出來就富爭議性，市民就唔會留意民生問題。咁你要兩者取其一嘅嘛，你唔可以一方面就話市民最關注民生問題，另一方面就話有政改就所有注意力去晒政改，就會忽略民生問題。
我哋𠵱家已經係第三名行政長官，大家都知道，三位行政長官都係由北京欽點，佢哋嘅表現，佢哋施政方面成果，大家有目共睹，今時今日似乎係一蟹不如一蟹。所以好難怪香港市民會覺得我哋要有權選出我哋嘅行政長官。何況普選唔單止係《基本法》，亦都係2007年人大常委所作嘅決定；就係答應2017年香港人透過一人一票選出行政長官，2020年能夠透過一人一票選出全部立法會嘅議席。所以7.1，市民應該利用呢個機會，以行動去表示佢哋嘅不滿。
記：中央政府或者特區政府，會受到遊行人數多少影響嗎？
陳：人數係非常之重要，因為我覺得無論建制派或者北京，都會留意7.1有幾多人參與。因為7.1參與嘅人數，係能夠真正反映市民嘅情緒，究竟係滿意定唔滿意，抑或極之不滿意。
睇睇2003年，如果唔係有50萬人上街遊行，迫使政府撤回草擬法案。同樣，如果我哋今時今日，對施政、對特首個人嘅行為、語言藝術等等，如果我哋係無法接受嘅，咁7.1就係一個良好嘅機會，用行動去表示我哋嘅不滿。
記：你已經參加7.1遊行好多年，睇返轉頭，有咩特別感受？
陳：2005年首次參加7.1遊行，我當時都有講過我希望有生之年能夠見到真正嘅普選。咁已經事隔八年，似乎普選都仲遙遙無期，特首仲毫無意思啟動政改諮詢程序，仲繼續講話有好多時間。大家都知道我哋時間無多，政改仲係原地踏步，試問點樣實現真普選？