由北河街的燒臘飯店，到大街小巷的拾荒者身旁，再到數十萬人邁步的街道上，都有他的影子。室內設計師Benson Tsang「不務正業」，總是在「理性包容」的紅旗高舉下，伸出感性鏡頭，戳破安定繁榮的假象。他形容自己只是社會拼圖中的一小塊，盼望真確的圖像可隨網絡散佈，感染更多香港人。
Benson不時在分享感人至深的真人真事，又勇於批評官僚與集團霸權，近年在社交網站炙手可熱。他擅長用鏡頭控訴政府，感動人心，去年便以一幅遊行時拍得的相片，奪得「Nat Geo Awards攝影大賽公開組冠軍」。
以攝影師身份參加遊行集會，是由2010年港人反高鐵運動開始。「反高鐵運動對我影響好大，先前我乜嘢都唔理，只係顧住搵錢。以前覺得遊行好無謂，但係反高鐵運動引起我注意，落到去集會現場，見到社會出現咗好多問題。我開始了解到，呢個地方屬於我哋，唔可以置諸不理。」
Benson自言曾經是工作狂，八、九成時間都在工作。「我係地產霸權嘅得益者，社會再貧富懸殊都唔關我事。我哋工作同地產掛鈎，樓價越高，我越得益」。然而，「去到咁上下年紀，發覺有啲唔妥。你見到土生土長嘅社會變壞緊，可唔可以唔理？」
facebook力量無遠弗屆
懷着這樣想法的，不止他一個，經常與Benson一起到社區派飯送暖平等分享的朋友，同時也是每年7.1參與遊行的人士。「我哋係左手握拳頭、右手伸援手，硬性同軟性抗爭一齊做。」主流傳媒都要經常跟進他們在facebook分享出來的故事。
每次7.1遊行，Benson都用紀錄者身份參與。不叫口號、不推鐵馬，以另一種方式推動社會。「好多人冇落現場，只係靠剪接過嘅新聞了解事件，真相被修改。我希望我嘅相片，可以扮演拼圖中嘅其中一塊，將真像嘅完整性提高。」
「我唔係影相發燒友，甚至唔係好鍾意影相。對我來講，相片只係為咗傳遞訊息。」他每次在遊行時拍下照片後，會利用facebook分享。一張照片，附加幾句文字，就可以把一個訊息傳遞十萬八千里，他認為比主流傳媒的渲染力更快更強。
「我特別鍾意影啲細眉細眼嘅嘢，因為每年7.1都有唔同主題。2012年主題係狼來了，遊行隊伍當中好多狼同埋Hello Kitty。」他認為，以業餘攝影師身份拍照分享圖片，比記者可以做到的更多。「報紙篇幅有限，我哋透過網絡可以無限分享。」
「每多一個人分享我張相，或者留言，就多一個人關心社會。」從2010年開始在facebook分享社運相片開始，Benson的網友在短短兩、三年間由200人增至現在的4,700人，還有千多名追蹤者：「我𠵱家明白，點解中共咁驚開放facebook。」
感受到香港人的可愛
從個人的得着而言，他說：「每次落到去都好開心，因見到人民嘅力量。一班班人扶老攜幼，放假唔去玩，由日頭曬到夜晚，呢個時候可感受到香港人咁可愛，真正感受到香港係屬於自己嘅。」
相片會說話，拿着相機遊行也分外投入：「拎住部相機遊行，擒高爬低，見到嘅嘢會比較多，感受到更加全面嘅氣氛。」他自己最愛的一幀7.1照片，是去年在新政總拍下的，群眾遊行至晚上，剛好遇上維港煙花滙演；這邊民怨沸騰，那邊歌舞昇平，荒謬諷刺。
Benson說，從遊行中感到香港民怨一年比一年嚴重，他相信官商勾結、貧富懸殊、政制不公義，會把今後每年參加7.1遊行的人數逐年推高。人們擔心一國兩制逐漸消失，Benson希望自己能盡點力，通過圖片訊息，把香港倒退的速度減慢。
