【得不償失】
有份僱用犯罪集團的茶餐廳老闆畢偉業，昨受訪時坦言衰貪心，他憶述是一名賣米推銷員招攬他落叠，集團後來派人帶齊工具，只花了十數分鐘便成功改動煤氣錶。
「貪得少少，好唔抵」
根據畢今日承認的案情，指他去年3月至8月間干擾他兩間茶餐廳的煤氣錶，慳得47,909元及92,337元。但畢昨日在豪園向本報記者聲稱，只呃了兩個月。
他說犯罪集團在「做手腳」前後拍照對比讀數變化以茲證明。他聲稱只幫襯兩次，指對方幫他減了約200度煤氣，以每度煤氣費13元計，他省卻約2,600元。然後他要給對方一半費用作報酬。「點知慳咗個幾兩個月就俾人拉，衰貪心，貪得少少，只係搞咗兩次（改錶），好唔抵！」
他無奈指餐廳月租廿幾萬，煤氣月費亦要2萬多，餐廳因案需閉門一周讓煤氣公司換新煤氣錶，連同律師費，要花幾十萬元。另一被告叢金貴則在前年11月至去年8月間慳27.8萬元電費及煤氣費，叢每月付3,000元予犯罪集團作報酬。
《蘋果》記者