近排股市偏弱，唔好以為炒股唔炒市就得，買中優質股，市場認為業績唔夠吸引，一樣死。昨午富士高（927）公佈，截至3月底，全年純利1.14億元，按年增102.5%，每股基本盈利27.9仙；末期息5仙，特別息7仙，合共12仙，呢份業績衰乜呢？
期內毛利升逾41%至3.25億元，經營溢利升近倍至1.39億元，由於融資收入上升而成本下降，純利增長超過一倍。睇到呢度，唔覺得有乜問題，原來生產設施使用率低過市場預期，令收入增長遜預期。
據報公司已發出指引，來年收入在未計新客之下都仍然會有增長，但對股價於事無補，昨插25%收2.83元。有人或會認為是市場反應過敏，但正好為陸續公佈的業績作一次預演，在中國水緊及環球經濟增長放緩下，業績稍有差池，股價唔只跌幾個巴仙，分分鐘會跌幾成。
內房殼股更值博
由於市場氣氛變得審慎，買入即將公佈業績的公司猶如博大細，即使買中開大，亦有機會因投資者唔滿意而捱沽，計落值博率非常唔吸引。
要炒，應該留意有購併及注資概念的股票，例如若干之前被內房股借殼的公司，由於有集資活動等住進行，股價向下炒的機會近乎零，而且呢類股票不是炒業績強弱，避過好多地雷，下半年若無新概念股登場，內房殼股如盛高置地（337）及恒力地產（169）等，將會強者越強。
歐陽風